قازاقستان يرانعا ۋران ساتۋدى كەيىنگە قالدىردى

بۇل تۋرالى شەتەل اقپارات قۇرالدارىنا سىلتەمە جاساپ centralasian.org اگەنتتىگى حابارلادى .

يادرولىق كەلىسىم بويىنشا، تەگەران يادرولىق باعدارلاماسىن دوعارىپ، ەسەسىنە يرانعا سالىنعان ەكونوميكالىق سانكتسيالار جەڭىلدەتىلۋى ءتيىس.

بريتاندىق New Europe اقپارات سايتىنىڭ حابارلاۋىنشا، «قازاتومونەركاسىپ» ءتوراعاسى عالىمجان ءپىرماتوۆ 21 - جەلتوقساندا استانادا وتكەن بريفينگتە يادرولىق كەلىسىمگە قول قويعان ا ق ش، رەسەي، قىتاي، ۇلىبريتانيا، فرانسيا جانە گەرمانيانىڭ ماقۇلداۋىنان كەيىن عانا يرانعا ۋران كونسەنتراتى جەتكىزىلەتىنىن ايتقان.

يران قازاقستاننان 950 توننا ۋران كونتسەنتراتىن ساتىپ الۋ تۋرالى كەلىسىمگە 2016 -جىلدىڭ ساۋىرىندە قول قويعان. ول كەلىسىم بويىنشا، ۋران بيىل جەتكىزىلەدى دەپ جوسپارلانعان، ءبىراق التى ەلدەن رۇقسات الۋ مەرزىمى سوزىلىپ كەتكەن سوڭ، ول كەيىنگە قالدىرىلدى.

يراندىق Financial Tribune سايتىنىڭ حابارلاۋىنشا، «قازاتومونەركاسىپ» كەلىسىم كۇشىن 2020 -جىلعا دەيىن ۇزارتقان جانە ۋران التى ەلدەن رۇقسات الىنعانىنا قاراي 2018-2020 -جىلدارى جەتكىزىلەدى دەپ جوسپارلانىپ وتىر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى