ەلباسى: قازاقستان قىرعىزستانمەن اراداعى بارلىق ماسەلەلەردى شەشۋگە دايىن
«وسى 25 جىلدىڭ ىشىندە ەكى ەلدىڭ تاۋەلسىزدىگى، قارىم- قاتىناسىمىز ودان ارى نىعايدى. 150 قۇجاتقا قول قويىلدى. مۇنداي قۇجاتتىق بازا، ەكى ەلدىڭ اراسىنداعى وسىنداي ينستيتۋتتسيونالدى قاتىناس باسقا ەلمەن قازاقستاندا جوق. تەك قىرعىزستانمەن وسىنشاما قۇجاتقا، كەلىسىمگە قول قويىلدى. ەكى ەلدىڭ اراسىندا بار ماسەلەلەردى شەشىپ، ارتقا قالدىرىپ، بولاشاققا بەت بۇرۋعا مۇمكىنشىلىگىمىز بار. ءبىز، مەن ءوزىم وعان ابدەن دايىنمىن»، - دەدى ەلباسى.
سونىمەن قاتار قازاقستان پرەزيدەنتى ەكى ەلدىڭ اراسىنداعى ساۋدا- ەكونوميكالىق بايلانىستارعا توقتالدى.
«ەكىجاقتى قارىم- قاتىناس جايىندا ايتار بولساق، اعىمداعى جىلدىڭ 10 ايىندا ساۋدا- ساتتىق 13 پايىزعا ارتتى. قازاقستان قىرعىزستاننىڭ نەگىزگى سەرىكتەستەرىنىڭ ءبىرى، نەگىزگى ينۆەستورلارىنىڭ ءبىرى سانالادى. وسى جىلداردىڭ ىشىندە قىرعىز ەكونوميكاسىنا شامامەن 650 ميلليون دوللار سالىندى، بىرنەشە بىرلەسكەن كاسىپورىن جۇمىس ىستەپ تۇر. قازاقستاندا قىرعىز بيزنەسى مەن كاپيتالى سالىنعان 700-دەن استام كاسىپورىن بار. ەندىگى ۋاقىتتا ەۋرازيالىق ينتەگراتسيا جاعدايىندا جۇمىس ىستەيمىز»، - دەدى نۇرسۇلتان نازاربايەۆ.
مەملەكەت باسشىسى قىرعىز ارىپتەسىمەن شاعىن قۇرامداعى كەلىسسوزدەر بارىسىندا وڭىرلىك ساياسي ماسەلەلەردىڭ كەڭ اۋقىمى قاراستىرىلعاندىعىن اتاپ ءوتتى.
«مينسكىدەگى سوڭعى كەزدەسۋدەن بەرى از عانا ۋاقىت ءوتتى. ءبىزدىڭ ۇكىمەتتەرىمىز وتە ۇلكەن ءتيىمدى جۇمىستاردى جۇرگىزىپ، سىزدەردى دە، ءبىزدى دە تولعاندىرعان ماسەلەلەردى شەشتى»، - دەدى ەلباسى.
اۆتور: مارلان جيەمباي
