قىتايداعى قازاقتار ماسەلەسى ۇنەمى باقىلاۋدا - سىرتقى ىستەر ءمينيسترى

وتىرىستا دەپۋتات باقىتگۇل حامەنوۆا قىتايداعى قازاقتاردىڭ قىسىم كورۋى جونىندە ب ا ق- تا تاراعان اقپاراتقا قاتىستى سۇراق قويدى.

«ءاربىر قازاق مەنىڭ جالعىزىم دەمەكشى، قازاقستان كۇللى قازاقتىڭ جالعىز وتانى ەكەنى حاق. دەسەك تە، جاز بويى ب ا ق- تا قىتايداعى قازاق دياسپوراسى تۋرالى اقپارات تارادى. قازىرگى تاڭدا قىتايداعى قازاق دياسپوراسىنىڭ جاعدايى تۇراقتالدى ما؟ » - دەدى دەپۋتات سىرتقى ىستەر مينيسترىنە.

ءوز كەزەگىندە قايرات ءابدىراحمانوۆ دەپۋتاتتىڭ سۇراعىنا بايىپپەن جاۋاپ بەردى.

«شەتەلدەگى قازاق دياسپوراسىنا قاتىستى ماسەلەلەر سىرتقى ىستەر مينيسترلىگىنىڭ جۇمىسىندا ۇلكەن ماڭىزدى باسىمدىق بولىپ سانالادى. ءارقاشان دا، قاي جەردە دە، كىممەن كەزدەسەك تە، سول جەردەگى قازاق دياسپوراسى بولسا، ءبىز وعان ۇلكەن ءمان بەرەمىز» ، - دەدى ول.

مينيستر بۇل ماسەلەدە وتە ساق بولۋ قاجەتتىگىن العا تارتتى.

«ەكىنشى جاعىنان قاراساق، بۇل ماسەلە باسقا مەملەكەتتىڭ ازاماتتارىنا تيەدى. بۇل - قازاقتىڭ دياسپوراسى. ءوز ەلىمىزگە قايتىپ كەلگەن ازاماتتار بار. ازاماتتىعىمىزدى العاندارى بار. ءبىراق ول شەتەلدىك ازاماتتار. سوعان بايلانىستى اتالعان ماسەلە، سول ەلدىڭ زاڭناماسىنا قاتىستى شەشىلەتىنىن ەسكەرۋىمىز قاجەت. سول سەبەپتى ءبىز وسىنداي كەلىسسوزدەر جۇرگىزگەن كەزدە حالىقارالىق زاڭ قاعيدالارىنا سۇيەنىپ جۇرگىزەمىز» ، - دەدى قايرات ءابدىراحمانوۆ.

سونداي- اق ۆەدومستۆو باسشىسى قازاقستان مەن قىتاي اراسىندا قاۋىپسىزدىك ماسەلەسىنە بايلانىستى ارنايى وتىرىس وتكەنىن ايتىپ ءوتتى.

«وسى جىلدىڭ 19 - جەلتوقسانىندا قىتايدىڭ بەيجىڭ قالاسىندا قوس ەلدىڭ سىرتقى ىستەر مينيسترلىكتەرى اراسىندا قاۋىپسىزدىك ماسەلەلەرى بويىنشا كەلىسسوز جۇرگىزدىك. ياعني ءمينيستردىڭ ورىنباسارى دەڭگەيىندە. سول كەلىسسوزدەر كەزىندە ءوز تاراپىمىزدان قازاقستان رەسپۋبليكاسى مەن قىتايدىڭ شىڭجاڭ ۇيعۇر اۆتونوميالىق ولكەسى اراسىندا مادەنيەت سالاسىندا ەكى جاقتى ىنتىماقتاستىقتى نىعايتۋ جوسپارىن ازىرلەۋ ماسەلەسىن كوتەردىك. وسىلايشا قىتاي تاراپىمەن ءبىر جوبانى جۇزەگە اسىرۋعا كىرىسەمىز» ، - دەپ تۇيىندەدى ءسوزىن مينيستر. 

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى