بەيبىت شۇمەنوۆ قانات يسلاممەن بىرگە جاساپ جاتقان جۇمىسى تۋرالى ايتىپ بەردى
ەسكە سالايىق، جەلتوقسان ايىنىڭ باسىندا قانات يسلام شىمكەنتتە بەيبىت شۇمەنوۆتىڭ باستاماسىمەن جاتتىققان ەدى.
- ءبىز قاناتپەن 2001-جىلدان بەرى دوس بولىپ كەلەمىز. مەن جۋىردا ماسكەۋدە ءبىر شارۋلارىممەن بولعان ەدىم. سول كەزدە ول ماعان قوڭىراۋ شالدى. قازىر ونىڭ پروموۋتەرى جانە باپكەرىمەن ءبىر تۇسىنىكسىز جاعداي بولىپ جاتىر. ول مەنى الماتىعا شاقىردى. مەن ءبىر كۇنگە الماتىعا ۇشىپ كەلدىم. سويلەسىپ الدىق.
ارينە، قانات مەنىڭ دوسىم. سوندىقتان وعان كومەك بەرۋدەن ەشقاشان قاشپايمىن. قولىمنان كەلگەنشە كومەكتەسەمىن. پروموۋتەرى جانە باپكەرىمەن بولىپ جاتقان ماسەلەلەردى شەشۋگە. تاجىريبەمەن دە الماسىپ الدىق. وعان مەنىڭ مەتوديكام ۇنادى. ءسويتىپ، بىرگە جاتتىعۋ تۋرالى شەشىمگە كەلدىك.
- دەمەك سىزدەر الداعى ۋاقىتتا دا بىرگە جۇمىس ىستەيسىزدەر عوي، ءيا؟
- ءيا. قازاقستانداعى كاسىپقوي بوكستى ەكەۋلەپ دامىتاتىن شىعارمىز. باسقا جىگىتتەر بۇل باعىتتا كوپ جۇمىس ىستەپ جاتىر. قاناتتىڭ ىسىنە بايلانىستى جانە مەنىڭ ماسەلەلەرىم بويىنشا امەريكادا بارايىن دەپ جاتىرمىز. جاڭا جىلعا دەيىن ەمەس شىعار. ويتكەنى، ۇلگەرمەيمىز. 2018-جىلى بارىپ پروموۋتەرلەرمەن كەلىسسوز جاساپ، بىرگە جۇمىس ىستەيمىز.
ايتا كەتەيىك، قاراشا ايىنىڭ سوڭىندا بۇكىل الەمدىك بوكس كەڭەسى (WBA) قانات يسلام مەن وسى سالماقتا رەيتينگتە ەكىنشى تۇرعان امەريكالىق دجون ۆەرا اراسىنداعى كەزدەسۋدىڭ ءوتۋىن مىندەتتەگەن ەدى. بۇل كەزدەسۋدە جەڭىسكە جەتكەن بوكسشى چەمپيونننىڭ مىندەتتى قارسىلاسى بولادى. ەكى بوكسشىنىڭ كومانداسىندا جەكپە-جەكتى ۇيىمداستىرۋعا 30 كۇن بار. كەرى جاعدايدا كەزدەسۋ ءباسساۋداعا قويلادى.
قانات يسلام سوڭعى كەزدەسۋىن 9- قىركۇيەك كۇنى ەلوردامىز استانا قالاسىندا وتكىزىپ، كانادالىق برەندون كۋكتى (18-1, 11 ك و) توعىزىنشى راۋندتا تەحنيكالىق نوكاۋتپەن جەڭدى. وسىلايشا وتانداسىمىز WBO NABO جانە WBA Inter- Continental بەلبەۋلەرىن ساقتاپ قالدى.
ال بەيبىت شۇمەنوۆ بولسا جاراقاتىنا بايلانىستى كارەراسىن اياقتاعان ەدى. ءبىراق ول بۇگىن ءبىزدىڭ پورتالعا بەرگەن سۇقباتىندا شارشى الاڭعا قايتا ورالۋدى ويلاستىرىپ جۇرگەنىن ايتىپ بەردى.
