ۇلى بريتانيا ەلشىسى قازاق تىلىنە ەرەكشە قۇرمەت كورسەتتى - نىعماتۋلين
ن. نىعماتۋلين اتاپ وتكەندەي، ك. براۋن ەكى ەل اراسىنداعى بايلانىستاردى، سونىڭ ىشىندە پارلامەنتارالىق قارىم- قاتىناستى تەرەڭدەتۋ جولىندا جەمىستى ەڭبەك ەتتى. ناتيجەسىندە، قازاقستان مەن ۇلى بريتانيا اراسىنداعى ستراتەگيالىق ارىپتەستىك قارقىندى دامىدى.
«سونىمەن بىرگە براۋن حانىم تەك ساياسي، مادەني، حالىقارالىق بايلانىستاردى نىعايتىپ قانا قويماي، ءاربىر ۇلتتىق مەيرامداردا قازاق تىلىندە جۇرەكجاردى لەبىزىن جەتكىزىپ، مەملەكەتتىك تىلگە دەگەن ەرەكشە قۇرمەتىن كورسەتتى. ن. نىعماتۋلين ەلشى حانىمنىڭ شىن مانىندە جوعارى ديپلوماتيالىق تاجىريبەسى وزگەلەرگە ۇلگى بولۋعا لايىقتى ەكەنىن ايتتى»، - دەپ اتاپ وتىلگەن ءماجىلىس باسپا ءسوز قىزمەتىنىڭ تاراتقان حابارلاماسىندا.
ءوز كەزەگىندە كەرولين براۋن قازاقستاندا ەڭبەك ەتكەن جىلدار ومىرىندەگى ەڭ ەلەۋلى كەزەڭدەردىڭ ءبىرى ەكەنىن ايتىپ، جالپى ەڭبەك جولىنىڭ قازاقستانداعى ەلشىلىك قىزمەتپەن اياقتالاتىنىنا ريزا ەكەندىگىن جەتكىزىپ، العىس ءبىلدىردى.
ايتا كەتەيىك، كەرولين براۋن ءبىزدىڭ ەلىمىزدە 4 جىل قىزمەت ەتتى.
اۆتور: رۋسلان عابباسوۆ
