جات جۇرتقا كوشۋگە ءماجبۇر بولعان قازاقتاردىڭ تاعدىرى تۋرالى فيلم
«بۇل جوبا تاريحي كۇردەلى كەزەڭدەردە تاعدىر تالكەگىنە ۇشىراپ، قيىندىق كورگەن، تۋعان جەرىنەن الىستاپ، جات جۇرتقا كوشۋگە ءماجبۇر بولعان ادامداردىڭ تاعدىرى تۋرالى. تاريحي دەرەكتەرگە كوز جىبەرسەك، 1930 -جىلدارداعى زوبالاڭنان حالقىمىزدىڭ تەڭ جارتىسى قىرىلىپ، كوبىسى شەتەلگە بوسىپ كەتتى. مىنە، ءدال وسى كەزەڭدە اۋعانستانعا دا ءبىراز قانداستارىمىز كوشىپ بارىپ، سول جاقتى پانالادى. سەريالداعى وقيعا وسى كەزەڭدى قامتيدى» دەيدى فيلمنىڭ پروديۋسەرى مۇرات بيدوسوۆ.
وقيعا جەلىسى بويىنشا اۋعانستانعا قاشقان قازاق بالاسى ەر جەتىپ، ون ساۋساعىنان ونەر تامعان شەبەر بولىپ وسەدى. ول اۋعاندىق ءبىر گەنەرالدىڭ كوزىنە ءتۇسىپ، سەنىمدى ادامىنا اينالادى. الايدا ەلدەگى ساياسي تۇراقسىزدىق كەزىندە گەنەرالعا قاستاندىق جاسالىپ، باس كەيىپكەرىمىز تۇركياعا بوي تاسالاۋعا ءماجبۇر بولادى. تۇرىك ەلىنە كەلگەننەن كەيىن قولونەرىنىڭ ارقاسىندا تەرى سەحىن اشىپ، اۋقاتتى كاسىپكەرگە اينالادى. تاعدىر جولى تىم قيىن بولىپ، ءوزىنىڭ كىم ەكەنىن، قايدان شىققانىن ۇمىتىپ قالعان قاسىم ۇزاق ىزدەنىستەن كەيىن قازاق ەكەنىن ءبىلىپ، تۋعان جەرىنە ورالادى. فيلمنىڭ نەگىزگى ماقساتى - تاعدىردىڭ جازۋىمەن اتاجۇرتتان الىستاپ، قيلى تاعدىر كەشكەن اعايىندارىمىزدىڭ وتانعا دەگەن ىستىق ىقىلاسىن كورسەتۋ بولسا، ەندى ءبىر جاعىنان حالقىمىزدىڭ باسىنان كەشكەن تاعدىرىن كورسەتۋ ارقىلى بۇگىنگى تاۋەلسىزدىگىمىزدىڭ قادىر- قاسيەتىن ۇعىندىرۋ.
كارتينادا باس كەيىپكەر قاسىمنىڭ وبرازىن 3 كەزەڭدە ءۇش اكتەر وينادى. بالالىق شاعى، جىگىتتىك كەزەڭى، قارتايعان شاعى. قارتايعان شاعىن ەلىمىزگە تانىمال اكتەر، تاياۋدا عانا «حابار» ارناسىنان كورسەتىلگەن «قاريا» تەلەحيكاياسىنىڭ باستى كەيىپكەرىن سومداعان باۋىرجان قاپتاعاي ويناسا، جىگىتتىك شاعىن ارنۇر قۇدياربەك ەسىمدى جاس اكتەر ورىندادى. سونداي- اق تۋىندىعا مارات اباي- ءدىلدا، دارحان سۇلەيمەنوۆ، عازيز سۇراپبايەۆ، ەرگەنباي ءابۋوۆ سياقتى اكتەرلەر، نارگيز التايباي ەسىمدى جاس اكتريسا شاقىرىلعان.
ايتا كەتەيىك، ءتۇسىرىلىم جۇمىستارى ەلىمىزدەن وزگە تۇركيانىڭ ىستامبۇل شاھارىندا وتكەن. كورەرمەن اتالمىش تۋىندىنى قاڭتار ايىندا تاماشالاي الادى.
بالىم رىسبەرگەن
«انا ءتىلى» گازەتى
