ەلىمىزدە العاش رەت ءسۇت بەزى وبىرىنا قاۋىپسىز وپەراتسيا جاسالدى
بۇگىن پرەزيدەنت ءىس باسقارماسىنىڭ مەديتسينالىق ورتالىعىندا رەسەيلىك دارىگەرلەر قازاقستاندىق ارىپتەستەرىمەن تاجىريبە الماسىپ، استانا قالاسىنىڭ ونكولوگيالىق ورتالىعىندا العاشقى ناۋقاستى قابىلدادى.
وتاندىق اقحالاتتىلاردىڭ ايتۋىنشا، ەلىمىزدە ءسۇت بەزى وبىرى جاسارىپ كەلەدى. بۇرىن ونكولوگيالىق دەرتتىڭ وسى تۇرىنەن جاسى 25-30 دان اسقان قىز- كەلىنشەكتەر ەمدەلسە، بۇگىندە 18-گە ەندى تولعان بويجەتكەندەر دە پىشاق استىنا تۇسۋگە ءماجبۇر. ال اۋرۋى اسقىنعان ناۋقاستاردىڭ كەۋدە تۇسىنداعى ليمفا تۇيىندەرى تۇگەل جويىلادى. وسىلايشا، قاتەرلى ىسىكتىڭ الدىن الۋعا بولادى. ءبىراق وپەراتسيا اياقتالعان سوڭ ەمدەلۋشىنىڭ بىردەن ايىعىپ كەتۋى بۇگىنگە دەيىن كۇماندى بولىپ كەلگەن ەدى. «ەندىگى جاعداي باسقاشا»، - دەيدى دارىگەرلەر.
مۇحتار تولەۋتايەۆ، استانا قالاسىنىڭ ونكولوگيا ورتالىعىنىڭ باس دارىگەرى:
- اۋىرعان سىرقات ادامعا راديوفارم پرەپارات بەرىلەدى تاعى. اپپارات ارقىلى بەلگىسى بەلگىلى بولادى، سول جەرگە دارىگەرلەر بەلگى قويىپ، وپەراتسيا ۇستىندە سول جەردىڭ عانا بەزىن الىپ تاستايدى. ۋلترادىبىستى زەرتتەۋ مەن مامموگرافيا قورىتىندىسىنان دەرتتىڭ 1 جانە 2- دارەجەلەرى انىقتالسا، تەك باستاپقى ليمفا ءتۇيىنى تەكسەرىلەدى. ول ءۇشىن نانوكوللويد قوسپاسى مەن تەحنەتسي حيميالىق ەلەمەنتىنىڭ قوسىندىسى ناۋقاستىڭ كەۋدە تۇسىنا ەكپە رەتىندە قولدانىلادى. راديواكتيۆتى فارماتسيەۆتيكالىق پرەپارات وبىردىڭ دامۋ جولىن الدىن الا انىقتاپ، دەرتتىڭ اسقىنۋ ىقتيمالدىلىعى تۋرالى بەلگى بەرەدى.
وسىعان وراي الەكساندر نيكيفوروۆ اتىنداعى جالپى رەسەيلىك شۇعىل جانە رادياتسيالىق مەديتسينا ورتالىعىنىڭ يادرولىق مەديتسينا ءبولىمىنىڭ مەڭگەرۋشىسى ۆياچەسلاۆ سۋحوۆ تا ءوز ويىن ءبىلدىردى.
ۆياچەسلاۆ سۋحوۆ، بۇكىل رەسەيلىك شۇعىل جانە رادياتسيالىق مەديتسينا ورتالىعىنىڭ يادرولىق مەديتسينا ءبولىمىنىڭ مەڭگەرۋشىسى:
- پايدا بولعان ىسىكتى جويۋ كەزىندە وعان ەڭ جاقىن ورنالاسقان ليمفا ءتۇيىنى دە الىنادى. بۇل رەتتە بىردەن شۇعىل تالداۋ جۇرگىزىلىپ، زاقىمدالعانى انىقتالسا، وپەراتسيا جالعاسىپ، وزگە ليمفا تۇيىندەرى دە بىرتىندەپ تەكسەرىلەدى. ال باستاپقى ءتۇيىنى ساۋ بولىپ شىقسا، وپەراتسيا توقتاتىلىپ، ناۋقاس 1-2 كۇندە ۇيىنە شىعارىلادى. ەمدەلۋشىنىڭ كەيىنگى دەنساۋلىعىنا ەش قاۋىپ تونبەيدى. بۇل مەديتسينالىق ءتاسىلدىڭ باستى ارتىقشىلىعى وسى.
رەسەيلىك ماماننىڭ ايتۋىنشا، وزىق تاجىريبە الەمدىك مەديتسينادا قولدانىلىپ كەلەدى.
www.24.kz
