قازاقپارات جاريالاعان ديزاينەرلەر بايقاۋىنىڭ جەڭىمپازدارى انىقتالدى
ايتا كەتسەك، «قازاقپارات» ح ا ا ەلباسىنىڭ «رۋحاني جاڭعىرۋ» باعدارلاماسىن قولداۋ ءارى ونى حالىق اراسىندا كەڭىنەن ناسيحاتتاۋ ماقساتىندا ديزاينەرلىك شەشىمدەر ءۇشىن كونكۋرس ۇيىمداستىرعان بولاتىن.
سونىمەن قاتار، بۇل بايقاۋ ارقىلى شىعارماشىلىق ورتانى قولداي وتىرىپ، زاماناۋي مادەنيەتتى «رۋحاني جاڭعىرۋ» قۇندىلىقتارىمەن جاقىنداستىرا ءتۇسۋ كوزدەلگەن.
كونكۋرسقا جۇمىستاردى قابىلداۋ 1 - قاراشادان باستالىپ 15 - جەلتوقسانعا دەيىن جالعاستى. ۇسىنىلعان جۇمىستار «ءبىلىم كۋلتى»، «باسەكەلىك قابىلەت»، «پراگماتيزم»، «ۇلتتىق بىرەگەيلىكتى ساقتاۋ»، «قازاقستاننىڭ ريەۆوليۋتسيالىق ەمەس، ەۆوليۋتسيالىق دامۋى»، «سانانىڭ اشىقتىعى» سەكىلدى تاقىرىپتارعا سايكەس قابىلداندى. ءاربىر قاتىسۋشى نەمەسە ۇجىم اتالعان 6 باعىتتىڭ ءارقايسىسىنا تەك 1 عانا جۇمىسىن ۇسىنۋعا مۇمكىندىك الدى.
كوپتەن كۇتكەن كونكۋرستىڭ شەشىمى بۇگىن استانادا جاريالاندى. جەڭىمپازداردى ماراپاتتاۋ راسىمىندە ءسوز سويلەگەن ق ر اقپارات جانە كوممۋنيكاتسيالار ۆيتسە- ءمينيسترى الان اجىبايەۆ وسىناۋ ماڭىزى جوعارى بايقاۋدىڭ وتۋىنە مۇرىندىق بولعان «قازاقپارات» ح ا ا ۇجىمىنا العىس ءبىلدىردى.
«شىنىندا دا، بۇل وتە جارقىن بايگە. بارلىق قاتىسۋشىلار مەن جەڭىمپازداردى قۇتتىقتاعىم كەلەدى. وسى بايقاۋدا جەڭىسكە ىلىكپەگەن قاتىسۋشى مىندەتتى تۇردە كەلەسى بايقاۋدا توپ جاراتىنىنا سەنىمىم زور. ەلباسىنىڭ «رۋحاني جاڭعىرۋ» باعدارلاماسىنىڭ يدەياسى وسىناۋ ەڭبەكتەردە كورىنىس تاۋىپ جاتىر. ءوز ءىسىنىڭ ماماندارى عانا ەمەس، بايقاۋعا جاس بۋىننىڭ وكىلدەرىنىڭ ءبىر كىسىدەي اتسالىسقانى قۋانتادى»، - دەيدى ۆيتسە- مينيستر.
جەڭىمپازداردى سونىمەن بىرگە، «قازاقپارات» ح ا ا باس ديرەكتورى اسقار ۋماروۆ قۇتتىقتادى.
«ەڭ الدىمەن ق ر اقپارات جانە كوممۋنيكاتسيالار مينيسترلىگىنە وسىنداي بايقاۋعا قولداۋ بىلدىرگەنى ءۇشىن العىس ايتقىمىز كەلەدى. وزدەرىڭىز بىلەتىندەي، قازىرگى زاماندا قوعام كوپ اقپاراتتى ۆيزۋالدى تۇردە قابىلدايدى. ءبىزدىڭ بايقاۋعا 150-دەن استام جۇمىس كەلىپ ءتۇستى. تاڭداۋ وتە قيىن بولدى. قازىلار دا بىرنەشە رەت جەڭىمپازدى انىقتاۋ وڭايعا تۇسپەگەنىن ايتىپ جاتىر. تۇسكەن جوبالار ءبىزدىڭ قوعامدا ەلباسىنىڭ باعدارلاماسىن قالاي جاقسى قابىلداعانىن كورسەتىپ وتىر»، - دەيدى اگەنتتىك باسشىسى.
بايقاۋدىڭ باس جۇلدەسىن پاۆلودار قالاسىنان كەلگەن دەنيس رومانوۆ جەڭىپ الدى. بايقاۋدىڭ جەڭىمپازىنا 2 ميلليون تەڭگەنىڭ سەرتيفيكاتىن الان اجىبايەۆ تابىستادى. ال جۇلدەلى ءبىرىنشى ورىندى جەڭىپ العان نازاربايەۆ ۋنيۆەرسيتەتىنىڭ ستۋدەنتى مادينا مۇقانوۆاعا «قازاقپارات» ح ا ا باس ديرەكتورى اسقار ۋماروۆ 1,5 ميلليون تەڭگەنىڭ سەرتيفيكاتىن تابىس ەتتى. ەكىنشى ورىندى (1 ميلليون تەڭگە) پاۆلودار قالاسىنان كەلگەن رۋستام ساريموۆ ۇتىپ السا، ءۇشىنشى ورىن ل. گۋميليەۆ اتىنداعى ە ۇ ۋ ستۋدەنتى ساۋلە جيەنقۇلوۆاعا (500 مىڭ تەڭگە) بۇيىردى.
بايقاۋدىڭ قورىتىندىسى ءتورت ورىنمەن عانا شەكتەلىپ قالعان جوق. كونكۋرسقا قاتىسقان كارينا بوگۋمبايەۆا (100 مىڭ تەڭگە)، مەرەكە مۇگيىن (100 مىڭ تەڭگە)، سابينا رىسقۇلوۆا (100 مىڭ تەڭگە)، ۆسيەۆولود ريگو سەباستەن (100 مىڭ تەڭگە)، اڭساعان مۇستافا (200 مىڭ تەڭگە)، قۋات ايدان مەن ديلشات ماعاۋينا (بىرلەسكەن اۆتورلىعى، 200 مىڭ تەڭگە)، ۆيكتوريا اسەرچيەۆاعا (200 مىڭ تەڭگە) ارنايى جۇلدە تابىستالدى.
«ارنايى جۇلدەگە ىلىككەندەردىڭ ىشىندە مەكتەپ وقۋشىلارى دا بار. سەبەبى، ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى ەڭ الدىمەن جاستاردىڭ بولاشاعى ءۇشىن جاريالانىپ وتىر. ءۇش قاتىسۋشى جاس بولسا دا، ءوزىنىڭ مىقتىلىعىن دالەلدەپ وتىر. جاس بولسا دا، ەلدىڭ بولاشاعىنا كوزقاراسىن ءبىلدىرىپ جاتىر. سوندىقتان، جاستاردى دا كوتەرمەلەۋدى ءجون دەپ شەشتىك. ءتىپتى سوناۋ قاراعاندى وبلىسىنىڭ اۋىلىنان ءبىر وقۋشى كەلىپ، جۇلدەگە ىلىكتى. قۇتتىقتاپ قويايىق»، - دەدى اسقار ۋماروۆ.
ايتا كەتسەك، وسى ۋاقىتقا دەيىن اتالعان بايقاۋعا 137 جۇمىس كەلىپ ءتۇسىپ، ونىڭ 120-ى بايقاۋ تالاپتارىنا سايكەس كەلگەن بولاتىن. قازاقستاننىڭ بارلىق تۇكپىر- تۇكپىرىنەن جۇمىستار كەلىپ ءتۇسىپ، ءتىپتى فرانسيا ەلىنەن دە ءبىر جۇمىس جولدانعان.
ەسكە سالا كەتسەك، بايقاۋدى وتكىزۋ بارىسىندا «قازاقپارات» ح ا ا پورتالىندا ونلاين- داۋىس بەرۋ جۇرگىزىلدى. كونكۋرستىڭ جەڭىمپازدارىن قۇرامىندا 7 ادامى بار قازىلار القاسى انىقتادى. شىنايى ءارى ءادىل شەشىم شىعارۋ ءۇشىن كونكۋرستىڭ قازىلار قۇرامىنا ءتورت ەلدىڭ وكىلى ەنگىزىلدى.
اتاپ ايتقاندا، ق ر اقپارات جانە كوممۋنيكاتسيالار ۆيتسە- ءمينيسترى الان اجىبايەۆ، ق ر مادەنيەت جانە سپورت مينيسترلىگى مادەنيەت جانە ونەر ىستەرى دەپارتامەنتىنىڭ ديرەكتورى الماز نۇرازحان، رەسەيدىڭ «تاسس» اقپارات اگەنتتىگىنىڭ ينفوگرافيكا توبىنىڭ باسشىسى الەكسەي نوۆيچكوۆ، «جەنمين حۋاباو» قىتاي باسپاسىنىڭ ديرەكتورى يۋي تاو، «انادولى اگەنتتىگىنىڭ» جەتەكشى ديزاينەرى مۇستافا فۋات، FineDesign جارناما اگەنتتىگىنىڭ ديرەكتورى تيگران تۋنيانتس پەن «قازاقپارات» ح ا ا ينفوگرافيكا جانە ۆەب- ديزاين قىزمەتىنىڭ جەتەكشىسى باحتيار امەنوۆ ۇزدىكتەردىڭ ۇزدىكتەرىن انىقتادى.
اۆتور: ايان بەكەن ۇلى
