ابايەۆ قازاق سايتتارىنىڭ نەگىزگى مىندەتتەرىن اتادى
دەپ حابارلايدى قازاقپارات ءتىلشىسى.
«بىرىنشىدەن، كونتەنتكە قاتىستى كوزقاراستى وزگەرتۋ كەرەك. قازىرگى كەزدە اقپاراتتىڭ مازمۇنىن قالىپتاستىرۋعا قولدانۋشىلار تىكەلەي ىقپال ەتە باستادى. وكىنىشكە قاراي، وسىنىڭ سالدارىنان سەنساتسيانىڭ سوڭىنا تۇسكەن سايتتار جەتكىلىكتى. ارينە، بۇل رەتتە اۋديتوريانى ۇدايى زەرتتەپ، ءار وقىرماننىڭ سۇرانىسىن ەسكەرۋگە تۋرا كەلەدى. الايدا كەز كەلگەن ماسەلەگە ەلدىك مۇددە، ۇلتتىق تانىم مەن تاربيە، سونداي- اق جۋرناليستىك ەتيكا تۇرعىسىنان قاراۋ قاجەت دەپ ويلايمىز. بۇقارالىق اقپارات قۇرالدارىنىڭ الەۋمەتتىك جەلىدەن باستى ايىرماشىلىعى دا، ارتىقشىلىعى دا وسى»، - دەدى د. ابايەۆ بۇگىن قازاق سايتتارى رەداكتورلارىنىڭ فورۋمىندا.
ءمينيستردىڭ ايتۋىنشا، كەلەسى جىلى اۋىلدىق جەردە تۇراتىن 2 ميلليوننان استام ادامعا ساپالى ينتەرنەت تارتۋ جۇمىستارى باستالادى. اتالعان شارالار ەكى جىلدا اياقتالادى دەگەن جوسپار بار. ال 2022 -جىلعا دەيىن قازاقستاننىڭ بارلىق اۋىلدارىندا جىلدام ينتەرنەت بولادى.
«ولارعا قانداي كونتەنت ۇسىنۋعا بولادى؟ مىنە، وسى ماسەلەنى سايتتارىمىز قازىردەن باستاپ زەرتتەپ، كونتەنتتىك ساياساتتى جولعا قويا السا، قولدانۋشىلاردىڭ بىرنەشە ەسەگە ارتاتىنى ءسوزسىز. ەندى، وزدەرىڭىز جاقسى بىلەسىزدەر، اۋىلدى جەرلەردە، كوبىنەسە، قازاق ءتىلدى باۋىرلارىمىز تۇرادى. ولار الدىمەن سىزدەردىڭ سايتتارىڭىزعا كەلەدى، سىزدەردىڭ باستى تۇتىنۋشىلارىڭىز بولادى»، - دەپ اتاپ كورسەتتى د. ابايەۆ.
ەكىنشى ماسەلە، ەل مۇددەسى سىنعا تۇسكەندە قازاق ءتىلدى بۇقارالىق اقپارات قۇرالدارى الدىنعى قاتاردان تابىلسا دا، ۇلتتىق مۇددەنىڭ جالاڭ ۇرانمەن الماسىپ كەتۋ جاعدايلارى از ەمەس. اتالعان ارەكەتتەر، كوپ جاعدايدا، ارانداتۋشىلىق سيپاتتا كورىنىس بەرۋدە.
«ماسەلەن، استاناداعى ءابۋ- دابي پلازا وقيعاسىن الايىق، ءبىز ىشكى ىستەر مينيسترلىگىمەن بىرگە زەرتتەۋ جۇرگىزدىك. سول كۇنى الەۋمەتتىك جەلىدە جۇرتتىڭ نامىسىنا ءتيىپ، جانجالدارعا شاقىرعان «پاتريوتتىق» پىكىرلەردىڭ استانادان جازىلماعانىن كوردىك. وسىنداي تاسادا وتىرىپ، تاس اتۋ ادەتى بەلەڭ الىپ تۇرعانى جاسىرىن ەمەس. جازعانداردىڭ كوبىسى باسقا قالالاردان استانالىقتارعا نەگە وتىرسىڭدار، قىرىپ جويماسىڭدار ما دەپ، ۇرانداتىپ كەتتى»، - دەيدى مينيستر ابايەۆ.
ءمينيستردىڭ سوزىنە قاراعاندا، ءداستۇرلى بۇقارالىق اقپارات قۇرالدارى مەن جاڭا مەديانىڭ قارىم- قاتىناسىن تەرەڭدەتۋ كەرەك. بۇل - ءۇشىنشى ماسەلە. سەبەبى بۇگىندە الەۋمەتتىك مەديانىڭ باسىمدىعى جايىندا ءجيى ايتىلادى. الايدا سوڭعى زەرتتەۋلەرگە سايكەس، تەلەديدار سياقتى ءداستۇردى بۇقارالالىق اقپارات قۇرالدارىنىڭ ىقپالى فەيسبۋكتەن ءۇش ەسە ارتىق. سوندىقتان ءداستۇرلى ب ا ق پەن جاڭا مەديانىڭ مۇمكىندىكتەرىن شەبەر ۇشتاستىرا بىلگەن ءجون.
اۆتور: ارمان اسقاروۆ
