قاراعاندى وبلىسىنىڭ تۋماسى بەلارۋستە جىل فۋتبولشىسى اتاندى

قاراعاندى وبلىسىنىڭ تۋماسى ميحايل گوردەيچۋك بەلارۋستىڭ ۇزدىك فۋتبولشىسى اتاندى، دەپ حابارلايدى قازاقپارات ءتىلشىسى فەدەراتسياعا سىلتەمە جاساپ.

«ميحايل گوردەيچۋك «بەلارۋسبانك - 2017 جوعارى ليگاسىنىڭ» ۇزدىك قاقپاشىسى، ۇزدىك شابۋىلشىسى جانە ۇزدىك ويىنشىسى اتاندى. ونىڭ ويىنى باتە كلۋبىنىڭ كەزەكتى چەمپيوناتىندا جەڭىسكە جەتۋىنە مۇمكىندىك بەردى. بيىل ميحايل گوردەيچۋك «بەلارۋسبانك - 2017 جوعارى ليگاسىنىڭ» 29 كەزدەسۋىندە ويناپ، 18 گول سالعان. سونداي-اق، ەلدىڭ باستى فۋتبول كومانداسى قۇرامىندا 6 ماتچ وتكىزگەن»، - دەلىنگەن ب ف ف رەسمي سايتىندا جاريالانعان حابارلامادا.

28 جاستاعى ميحايل گوردەيچۋك قاراعاندى وبلىسىنىڭ ساران قالاسىندا تۋعان. فۋتبولمەن 8-9 جاسىندا ساران سپورت مەكتەبىندە اينالىسا باستاعان. كەيىنىرەك وتباسىمەن قاراعاندى قالاسىنا كوشكەن. 17 جاسىندا جەرگىلىكتى «شاحتەرمەن» العاشقى كاسىبي كەلىسىمشارتىن بەكىتكەن. 2007-جىلى «شاحتەردىڭ» فارم- كلۋبى قۇرامىندا قازاقستاننىڭ ءبىرىنشى ليگاسىنا قاتىسقان. 2008-جىلدان باستاپ بەلارۋستا ويناپ كەلەدى.

باتە كلۋبىنىڭ جانە بەلارۋس قۇراماسىنىڭ جارتىلاي قورعاۋشىسى. بەلارۋس رەسپۋبليكاسىنىڭ حالىقارالىق دەڭگەيدەگى سپورت شەبەرى. 2012-جىلى لوندوندا وتكەن وليمپيادا ويىندارىنىڭ قاتىسۋشىسى. بەلارۋس ۇلتتىق قۇراماسىندا العاش رەت 2013-جىلدىڭ 15- قاراشاسىندا البانيا قۇراماسىمەن جولداستىق كەزدەسۋگە قاتىستى.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى