استاناداعى ءتۇتىن نەشە كۇن ساقتالادى - فوتو
اتاپ ايتقاندا، كومىرمەن جىلىتىلاتىن جەر ۇيلەردىڭ، سونداي-اق جەس ءتۇتىنى شاھاردى ءوز قۇرساۋىنا الدى.
«قازگيدرومەت» ر م ك كەزەكشىلىك توبىنىڭ مالىمەتىنە قاراعاندا، سوڭعى كۇندەرى جەلسىز تىمىق بولعاندىقتان قالانى ءتۇتىن باستى.
«جەل بولماعاننان كەيىن قالاداعى جىلۋ ەلەكتر ستانساسىنىڭ، جەكەمەنشىك سەكتور ۇيلەردە جاعىلعان كومىردىڭ ءتۇتىنى ەشقايدا كەتپەي، قالانىڭ اسپانىن تورلاپ تۇر. تىمىق اۋا-رايى بىرنەشە كۇننەن بەرى ساقتالۋدا. سونىمەن قاتار ەرتەڭ، ارعى كۇنى دە جەل جوق. كۇندىزگى تەمپەراتۋرا -10 مەن -13-تىڭ ارالىعىندا بولادى. جەلدىڭ ەكپىنى كۇشەيسە، وسىنداي قويۋ ءتۇتىن بولمايدى»، - دەيدى «قازگيدرومەتتىڭ» كەزەكشىلىك توبى.
بۇدان بۇرىن حابارلانعانداي، جەلتوقسان ايىنىڭ باسىندا ەلوردا اكىمى اسەت يسەكەشەۆ استاناداعى ءتۇتىن ماسەلەسىن قالاي شەشۋگە بولاتىنىن ايتقان ەدى.
«ەكولوگيا باسقارماسىنىڭ مالىمەتىنشە، لاستانۋدىڭ 50 پايىزى كولىكتەردەن جانە ولاردىڭ تىم كوپتىگىنەن، جانارماي ساپاسىنىڭ ناشارلىعىنان بولادى. سول سەبەپتى ءبىز ءار سەگمەنت بويىنشا الگوريتمدەر قۇراستىردىق. ەكى جىل ىشىندە جەس- تەرگە قوسىمشا قۇرىلعىلار ورناتۋ كەرەك»، - دەدى يسەكەشەۆ يندۋستريالاندىرۋ كۇنى قارساڭىنداعى جالپىۇلتتىق تەلەكوپىر بارىسىندا.
قالا باسشىسى كومىر مەن جاعارمايدىڭ ساپاسىنا تالاپتار قويىلۋى مۇمكىن ەكەنىن ايتتى.
«كولىك بويىنشا تاپسىرما كۇردەلىرەك. بىرىنشىدەن، ديزەلدى وتىن ساپاسىنا باقىلاۋدى كۇشەيتۋ كەرەك. ەكىنشىدەن، ءبىرىنشى كەزەڭدە كوممۋنالدىق تەحنيكالاردى گازعا اۋىستىرۋدى جوسپارلاپ وتىرمىز. ءبىز بۇل ماسەلەنى ەكى-ءۇش جىل ىشىندە شەشۋ كەرەك ەكەنىن جاقسى تۇسىنەمىز»، - دەدى ول.
