الماتىدا مۇمكىندىگى شەكتەۋلى بالالار سيركتەگى عاجايىپتى تاماشالادى - فوتو
شارانى تاماشالاۋعا مۇمكىندىگى شەكتەۋلى، جەتىم، الەۋمەتتىك تۇرمىسى تومەن وتباسىنان شىققان بالالار كەلدى.
بۇلدىرشىندەر بەلگىلى ەرتەگىلەر مەن انيماتسيالىق فيلمدەردىڭ كەيىپكەرلەرى الىپ ترانسفورمەرلار، سيقىرلى پوني پينكي پاي مەن رادۋگا، باتىل موانا، اياز اتا مەن اقشاقاردى كوردى.
«ءبىزدىڭ اۋديتوريامىز كوبىنەسە بالالار. ولارعا نە ۇنايدى؟ ولارعا ەرتەگى كەيىپكەرلەرى، انيماتسيالىق فيلم كەيىپكەرلەرى ۇنايدى. سىزدەر بۇگىن ساپالى كوستيۋم، ساپالى جۇمىس كوردىڭىزدەر. تسيرك جانرى - سايكەسپەيتىن جانرلاردى بىرىكتىرۋ بولىپ تابىلادى. بۇل - بىرەگەي، وقيعا جەلىسىن بولجاپ بولمايتىن، سيرك ونەرىندەگى بارلىق جانرلارىن بىرىكتىرەتىن قويىلىم- ەرتەگى»، - دەدى قويۋشى- رەجيسسەر مارينا رەدكو.
ايتا كەتۋ كەرەك، بۇگىن ساحناعا ەڭ جاس ءارتىس - 6 جاستاعى ءاليا شىقتى. ءبۇلدىرشىن 5 جاسىنان باستاپ گيمناستيكاعا قاتىسىپ كەلەدى. ونىڭ اتا- اناسى تۇتقابايەۆا ينديرا مەن وڭالبايەۆ تالعات وسى تسيرك ارتىستەرى. ءاليادان ۇلكەن تۇڭعىش ۇلدارى دانيار دا بۇگىن مانەجدە ونەر كورسەتتى.
«ءبىز وتباسىمىزبەن تسيركتە جۇمىس جاسايمىز. ەكى بالامىزدى دا اقىرىنداپ باۋلىپ جاتىرمىز. قىزىم تۋعالى بەرى دەنەسىنىڭ يىلگىشتىگى، بۋىندارىنىڭ جۇمساقتىعى كورىندى. كىشكەنتاي كەزىندە شپاگاتتا ۇيىقتاپ جاتا بەرەتىن. سوسىن گيمناستيكاعا بەردىك. نەگىزى دەبيۋت بىلتىر بولۋى ءتيىس ەدى. بىلتىر ءوزى ابدەن قويىلىمنىڭ الدىنا كەلگەندە شىقپايمىن دەدى»، - دەدى اناسى ينديرا تۇتقابايەۆا.
سونىمەن قاتار شابىت فەستيۆالىنىڭ لاۋرەاتتارى، بىرنەشە حالىقارالىق بايقاۋلاردىڭ جەڭىمپازدارى اننا مەن ولگا دەميدوۆا، مارينا ستارودۋبوۆا ونەر كورسەتتى.
جاڭا جىلدىق شوۋعا الەمدىك سيرك ارتىستەرى، ۇيرەتىلگەن ايۋ، ءيت، تۇيە، جىلقى جانە پونيلار قاتىسادى.
سيقىرلى جاڭا جىلدىق شوۋدى كاسىبي سەناريستەر مەن قويۋشى- رەجيسەرلار، كومپوزيتورلار مەن سۋرەتشى- مودەلەرلەر، حوەوگرافتار مەن بالەتمەيستەرلەر، دىبىس جانە جارىق رەجيسسەرلەرى دايىنداعان.
ارتىستەردىڭ ونەرى فانتاستيكالىق لازەرلىك ارنايى اسەرلەرمەن، كاسىبي ساحنالىق جارىق پەن دىبىس، LED ەكرانداعى بەينەلەۋمەن كوركەمدەلدى.
