زىلتەمىرشى فارحاد حاركيگە اقتوبەدەن ءۇي بەرىلدى

ريو وليمپياداسىنا اقتوبە وبلىسى اتىنان قاتىسىپ، قولا جۇلدەگە يە بولعان زىلتەمىرشى فارحاد حاركيگە وتكەن جىلى 1 بولمەلى پاتەردىڭ كىلتى تابىس ەتىلگەن بولاتىن. ال بۇگىن اقتوبە وبلىسى اكىمىنىڭ ورىنباسارى ەربول نۇرعاليەۆ پاتەردىڭ كىلتىن بەرىپ، باسپاناعا ەۋرو جوندەۋ جۇرگىزىلگەنىن ايتىپ بەردى.

«وليمپيادا جۇلدەگەرى فارحاد حاركيگە وتكەن جىلى پاتەر سەرتيفيكاتى بەرىلدى. ورتاق شەشىممەن پاتەرگە ەۋرو جوندەۋ جۇرگىزىلىپ، جابدىقتالدى. جاڭا سىيدى تاۋەلسىزدىك كۇنى تابىس ەتۋدى ءجون كوردىك. مەملەكەت ەل ءۇشىن ەڭبەك ەتىپ جۇرگەن ازاماتتارىن باعالايدى»، - دەدى ەربول نۇرعاليەۆ.

زىلتەمىرشى فارحاد حاركي قازاقستان قۇراما كومانداسىندا جاتتىعادى. اقتوبەلىك كاسىپكەر تالعات بايماشەۆتىڭ قامقورلىعىنداعى سپورتشى ەندى اقتوبەگە كەلىپ، وڭىردە تۇرادى. ونى ەربولات ۇرقاشبايەۆ جاتتىقتىرادى.

«مەن قازاقستاندىقتارعا العىس ايتامىن. قازاقستاندى تاۋەلسىزدىك كۇنىمەن قۇتتىقتايمىن!» - دەدى ف. حاركي. زىلتەمىرشى قازىر ازيا ويىندارى مەن الەم بىرىنشىلىگىنە دايىندالىپ جاتىر. ول الداعى وليمپيادادا التىن الىپ، ەلدى قۋانتۋ ءۇشىن بارىن سالاتىنىن ايتتى. «الدىمەن وليمپيادا التىنى، كەيىن وتباسىن قۇرۋ تۋرالى ويلانامىن»، - دەدى زىلتەمىرشى.

اقتوبەلىك سپورت شەبەرلەرى، زىلتەمىرشىلەر فارحاد حاركيگە ۇلكەن ءۇمىت ارتىپ وتىر. ونىڭ التىن مەدال الاتىن قاسيەتتەرىن تىزبەكتەپ بەردى.

«فارحادقا كوپ ءۇمىت ارتامىز. ونى 5-6  جىلدان بەرى تانيمىن، باقىلاپ ءجۇرمىن. ءتىپتى جاتتىعۋلارىنا قاتىسىپ، قاراپ، كۇشىن ءبىلدىم. فارحاتتىڭ تەحنيكاسى مىقتى، بەلى مەن اياعى مىعىم. تەك وعان قازاق جىگىتتەرىنە ءتان جۇرەك كەرەك. جۇلقا، سەرپە كوتەرۋى مىقتى. التىن اكەلەتىن بالا»، - دەدى سپورت ارداگەرى قادىرجان ىزعاليەۆ.

اۆتور: التىناي ساعىندىقوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى