قىتايداعى قازاقتار اسىق اتۋدان جارىس وتكىزدى - فوتو
اسىق ويىنى - تاربيەلىك ءمانى زور، قازاق حالقىنىڭ ءداستۇرلى ويىندارىنىڭ ءبىرى. كوشپەلى ءومىر تۋدىرعان ءتول تۋما ونەر ەسەپتەلەدى.
مىنە، وسىنداي ۇلتتىق قۇندىلىعىمىزدى الىستاعى اعايىن دا ۇلىقتاۋعا ءوز ۇلەسىن قوسۋدا.
جاقىندا قىتايداعى قانداستارىمىز ەڭ كوپ شوعىرلانعان ىلە ايماعى كۇنەس اۋداندىق 5№ ورتا مەكتەپتە وقۋشىلار اراسىندا اسىق ويىنىنان جارىس ءوتتى.
جەڭىمپازدارعا ارنايى ديپلومدار مەن باعالى سىيلىقتار تاراتىلدى. سونداي-اق، الداعى ۋاقىتتا مەكتەپ ۇجىمى دەنە شىنىقتىرۋ ساعاتتارىندا ءتول سپورتىمىز سانالاتىن اسىق ويىنىن قوسىمشا ساباق رەتىندە الىپ، جۇيەلى ۇيرەتۋدى جولعا قويماق نيەتتە ەكەن.
اتالعان اقپارات كوزىندە «مەكتەپ ارنايى اسىق ويىنى الاڭىن جاساپ، جارىستار وتكىزىپ، اسىق اتۋ شەبەرلەرىن انىقتاپ كەلەدى. بۇل باستاما جاس وسپىرىمدەردىڭ ۇلتتىق ويىندارعا قىزىعۋشىلىعىن ارتتىرىپ، ءداستۇرلى ويىندار جونىندەگى تانىم-تۇسىنىگىن تەرەڭدەتتى» دەپ جازىلعان.
اۆتور: كۇنسۇلتان وتارباي
