قىزىلوردالىق جاس عالىمدار «اقتوس» اتتى روبوت ويلاپ تاپتى

قورقىت اتا اتىنداعى قىزىلوردا مەملەكەتتىك ۋنيۆەرسيتەتىنىڭ فيزيكا- حيميالىق تالداۋ ادىستەرى ينجەنەرلىك بەيىندەگى زەرتحاناسى بىرنەشە زەرتتەۋ جۇمىستارىن جۇرگىزىپ جاتىر. جاس عالىمدار كۇرىش قاۋىزىنان بەلسەندىرىلگەن كومىر الۋعا بولاتىنىن دالەلدەدى.

«سىر ءوڭىرىنىڭ نەگىزگى داقىلى - كۇرىش. بيىلدىڭ وزىندە 500 تونناداي كۇرىش ەگىلىپ، جينالدى. ال ءونىم جينالعاننان كەيىن توننالاعان كەبەك پەن قاۋىزى پايداعا اسپاي، ورتەلەدى. ءبىز سول ىسكە اسقىسىز تاستالعان كەبەك پەن ساباندى عىلىمي جۇمىسىمىزعا پايدالاندىق. كۇرىشتىڭ قاۋىزىن ابدەن مايدالاپ، ارنايى پەشكە قىزدىردىق. سودان قارا ۇنتاق دايىن بولدى. بۇل ءدارىحانالاردا ساتىلىمدا تۇرعان - بەلسەندىرىلگەن كومىر. تابيعي، ارزان ءونىم شىعاردىق» ، - دەپ ءتۇسىندىردى فيزيكا- حيميالىق تالداۋ ادىستەرى ينجەنەرلىك بەيىندەگى زەرتحاناسىنىڭ جەتەكشىسى نۇربول اپپازوۆ.

بۇگىندە بۇل زەرتحانادا 10 قىزمەتكەر جۇمىس ىستەيدى. ايتا كەتەرلىگى، ونىڭ تورتەۋى 1991 -جىلى ەلىمىز تاۋەلسىزدىك العان جىلدارىندا دۇنيەگە كەلگەن جاستار ەكەن. ولار - تۇرمانوۆ راحىمجان، ەسپانوۆا ينديرا، جاپپاربەرگەنوۆ راحمەتۋللا. جاستاردىڭ عىلىمعا قىزىعۋشىلىعى زور. ال، قازىرگى تاڭدا بەلسەندىرىلگەن كومىرگە پاتەنت الۋ جۇمىستارى جۇرگىزىلىپ جاتىر.

سونىمەن قاتار، IT- ماماندار «اقتوس» اتتى روبوت ويلاپ تاپقان. قمۋ ەسەپتەۋ تەحنيكاسى جانە اقپاراتتىق تەحنولوگيا كافەدراسىنىڭ مەڭگەرۋشىسى ءسابيت يبادۋللا روبوت تۋرالى ايتىپ بەردى.

«رەسەيدە وقىپ كەلدىم. IT سالاسى بويىنشا ءبىزدىڭ جاس عالىمدار "اقتوس" ەسىمدى قازاقى يت روبوتىن جاساپ شىعاردىق. اقتوس بۇگىندە ءتورت اياقتاپ ءجۇرۋ، وتىرۋ، جاتۋ، باسىن قوزعاۋ سياقتى قيمىلداردى عانا بىلەدى. ەندى ءيىس سەزۋ، كورۋ، ينتەللەكتۋالدى ويلاۋ ارقىلى تاپسىرمالاردى ورىنداۋ قىزمەتىن ۇيرەتپەكشىمىز. ءيتتىڭ دەنەسى 3D پرينتەر ارقىلى جاسالعان» ، - دەيدى ءسابيت يبادۋللا.

 يبراش ءالي

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى