قىتايدا ءولىم جازاسىنا كەسىلگەن قازاقستان ازاماتى ەلگە قايتارىلدى
سوتتى ازاماتتى قازاقستانعا بەرۋ پروتسەسىن قازاقستاننىڭ قىتايداعى ەلشىلىگى، ق ر باس پروكۋراتۋراسى جانە قىتاي ادىلەت مينيسترلىگى ۇيىمداستىردى.
الماتى وبلىسىندا 1989-جىلى تۋعان ازاماتتى قىتايلىق قۇقىق قورعاۋ ورگاندارى گۋاندۋن پروۆينتسياسىنىڭ گۋانچجوۋ قالاسىندا 2009-جىلى ەسىرتكى تاسىمالدادى دەگەن ايىپپەن ۇستاعان بولاتىن. ول ءولىم جازاسىنا كەسىلىپ، ۇكىمدى ورىنداۋ مەرزىمى 2 جىلعا شەگەرىلگەن، ال 2011-جىلى ۇكىم ءومىر بويى باس بوستاندىعىنان ايىرۋ جازاسىمەن اۋىستىرىلدى.
قازاقستاندىق ديپلوماتتار مەن ق ر باس پروكۋراتۋراسىنىڭ قىزمەتكەرلەرى سوتتالعان ازاماتتاردى قازاقستانعا قايتارىپ، جازاسىن ەلىمىزدە وتەۋى بويىنشا قىتاي تاراپىمەن كوپتەگەن جۇمىستار جۇرگىزدى.
اعىمداعى جىلى قىتايدان قازاقستانعا تاعى دا 4 ازامات، ال 2015-جىلعى تامىزدان بەرى 15 سوتتالعان ازامات قايتارىلدى.
قازاقستان رەسپۋبليكاسى سىرتقى ىستەر مينيسترلىگى مەن باس پروكۋراتۋراسى وسى قىزمەتتى باسقا ەلدەردە دە جۇرگىزىپ كەلەدى.
