ەلباسى ەسىموۆكە، ۇشكەمپىروۆكە «قازاقستاننىڭ ەڭبەك ەرى» اتاعى نە ءۇشىن بەرىلگەنىن ايتتى
بيىل «قازاقستاننىڭ ەڭبەك ەرى» اتاعى احمەتجان سماعۇل ۇلى ەسىموۆكە بەرىلدى. ول مەنىڭ سەنىمدى سەرىكتەستەرىم رەتىندە تاۋەلسىز قازاقستاننىڭ ىرگەسىن قالاۋعا ۇلەس قوستى. ۇكىمەت باسشىسىنىڭ ورىنباسارى، مينيستر، الماتىنىڭ اكىمى قىزمەتىندە بولىپ ەل دامۋىنا ەرەكشە ەڭبەك ءسىڭىردى. ەل مۇددەسىن بەرىك ۇستايتىن وتان سۇيگىش رەتىندە ءوزىن كورسەتتى. بيىل ءبارىمىز كۋا بولعان، ابىروي مەن بەدەل اكەلگەن حالىقارالىق «ەكسپو» كورمەسىن وتە تابىستى وتكىزدى»، - دەپ اتاپ ءوتتى ەلباسى.
سونىمەن قاتار مەملەكەت باسشىسى «تەڭىزشيەۆرويل» ج ش س- ءنىڭ مەنەجدەرى رۋسلان قۋاتوۆقا دا وسىناۋ جوعارى اتاقتى تابىستاپ، ونىڭ مۇناي ءوندىرۋدى ءتيىمدى تەحنولوگيامەن جابدىقتاۋ ىسىنە، حالىقارالىق سەرىكتەستەرمەن بايلانىستى جولعا قويۋعا ۇلكەن ۇلەس قوسقانىن اتاپ ءوتتى.
«قازاقستاننىڭ ەڭبەك ەرى» اتاعىمەن جاقسىلىق ومىربەك ۇلى ۇشكەمپىروۆ ماراپاتتالدى. ول ءبارىڭىز بىلەسىزدەر، داڭقتى بالۋان. دۇنيەجۇزى جانە وليمپيادا ويىندارىنىڭ چەمپيونى. حالقىمىزدىڭ اتىن سول كەزدەن تانىتىپ كەلە جاتىر... بۇگىندە ءىرى شارۋاشىلىعىن باسقارىپ وتىر. اۋىلدى وركەندەتۋگە ەرەن ەڭبەگىن 20 جىلدان بەرى سىڭىرۋدە. ءوزى باسقاراتىن شارۋاشىلىقتى جوعارى دارەجەگە جەتكىزدى. ول شىعاراتىن ەت بۇگىندە رەسەيگە، قىرعىزستانعا، بارلىق ەلدەرگە ساتىلۋدا. ەلدىڭ اراسىندا ابىرويى ۇلكەن. قازىر ءوز جۇمىسىن عانا ورىنداپ قويماي، تۋعان ەلىنە ادال قىزمەت ەتۋدىڭ ۇزدىك ۇلگىسىن كورسەتىپ كەلەدى. ءوز قارجىسىنا اۋىلدا كوپسالالى سپورت كەشەنىن، بالاباقشا، جاس وتباسىلارعا ءۇي سالعىزدى. مۇنان وزگە دە ۇلكەن نىساندار سالىپ، اۋىلداعى ەلدىڭ العىسىنا يە بولدى»، - دەدى نۇرسۇلتان نازاربايەۆ.
