بەسىكتىڭ قۇرىلىسى تۋرالى
1. ارقالىق (ارىس، بەلاعاش) - ۇزىندىعى 70-75 سانتيمەتر، ۇستاپ تۇرۋعا ىڭعايلى، بەسىكتىڭ ەڭ ۇستىڭگى، كولدەنەڭ، جۇمىر بەل اعاشى.
2. بوگەن (الدىڭعى باس، ارتقى باس) - نەگىزىنەن جاس تال ءمىنسىز جونىلىپ، جاقسى ارلەنىپ، مورعا قىزدىرىلىپ، قىرتىسىن سىرتىنا قاراي يگەن بەسىكتىڭ ەكى باسى.
3. جاقتاۋ. ول - تورتەۋ. ەكى ۇلكەن جاقتاۋدىڭ ۇزىندىعى ارقالىقپەن بىردەي، قوس بوگەننىڭ اڭعارلارىن كەرىپ تۇراتىن ەكى قىسقا جاقتاۋدىڭ ەنى بەسىك ەنىنە تەڭ.
4. شاباق. بۇل دا - تورتەۋ. ەكى بوگەننىڭ اياقتارىن قوسىپ تۇراتىن ۇزىن جاقتاۋلارعا بىركەلكى قاشىقتىقتا كولدەنەڭ قاشالىپ بەكىتىلگەن بەسىك ەنىندەي تاقتايشا.
5. ساباۋ. ول - ەكەۋ. ەكى بوگەندى قوسىپ تۇراتىن ەكى ۇزىن جاقتاۋدىڭ استىنا تۇسەتىن، بەسىك ۇزىندىعىنا تەڭ جۇمىر اعاش.
6. جورعا. بۇل دا ەكەۋ. بوگەندەردىڭ يىلگەن باسىنا قاراما- قارسى بەكىتىلەدى، ونىڭ استىڭعى قىرى قايقى - بەسىكتىڭ تابانى. تاباننىڭ قايقىلىعى بەسىكتىڭ ءبىرقالىپتى جەڭىل تەربەلۋىن قامتاماسىز ەتەدى. بەسىكتىڭ وسى بولىگى - جورعانى قازاقتار تابان دەپ تە اتاي بەرەدى.
7. تاقتاي. بەسىكتىڭ تۇبەك ورنالاساتىن، توسەك سالىناتىن ورتاسىنداعى بولىگى.
8. شۇمەك. بەسىكتەگى ءسابيدىڭ كىشى دارەتى ءۇشىن قويدىڭ اسىق جىلىگىنەن ءبىر باسى تەسىلىپ، ەكىنشى باسىنىڭ تومەنگى جانى ويىلىپ جاسالعان تۇتىكشە. كەيدە ايرىقشا اپپاق بولۋى ءۇشىن ونى العاش پايدالانار الدىندا سۇتكە قايناتىپ الادى.
9. تۇبەك. ءسابيدى بەسىككە بولەگەندە جايالىعى بىلعانباس ءۇشىن بەسىكتىڭ ورتاسىنداعى تاقتايدى تەسىپ ورناتاتىن المالى- سالمالى كيىز قالتا. شاعىن شىنى قۇتىلار (بانكىلەر) پايدا بولا باستاسىمەن سودان تۇبەك جاسالاتىن بولدى. شۇمەكتىڭ ۇشى تۇبەككە سۇعىنىپ تۇرادى.
