عارىشكەرلەر مىنگەن كاپسۋلا قازاقستان جەرىنە قوندى
«روسكوسموس» ءوزىنىڭ online.roscosmos.ru سايتىندا قونۋ ورنىنان تىكەلەي ترانسلياسيا جۇرگىزدى. وربيتاداعى 139 تاۋلىكتىك جۇمىستان كەيىن حالىقارالىق عارىش ستانساسىنىڭ(ح ع س) 52- جانە 53- ۇزاق مەرزىمدى ەكسپەديسياسىنىڭ مۇشەلەرى - «روسكوسموس» كوسموناۆتى سەرگەي ريازانسكي، NASA استروناۆتى رەندولف برەزنيك جانە ەۋروپا عارىش اگەنتتىگىنىڭ استروناۆتى پاولو نەسپولي جەرگە ورالدى.
«سويۋز م س-05» ەكيپاجى 2017 -جىلعى 29 -شىلدەدەن بەرى ح ع س- دا بولدى. ەكيپاج مۇشەلەرى ستانسادا عىلىمي- قولدانبالى زەرتتەۋلەر مەن ەكسپەريمەنتتەر وتكىزدى، ح ع س- نىڭ جۇمىسقا قابىلەتتىگى بولۋىن قامتاماسىز ەتتى، وعان جۇك تاسىمالداۋشى عارىش كەمەلەرى اپارعان قوندىرعىلاردى ورناتتى.
كاپسۋلانىڭ جەرگە قونۋى شتاتتىق رەجيمدە ىسكە اسىرىلدى. كۇشتى جەل تۇرۋىنا بايلانىستى عارىشكەرلەرمەن كەزدەسۋ ءراسىمى قىسقا بولاتىنى حابارلاندى. ءدال قازىر عارىشكەرلەر تۇرعان جەردەن ترانسلياتسيا جۇرگىزىلىپ جاتىر.
سەرگەي ريازانسكي مەن رەندولف برەزنيك وسىمەن ەكىنشى عارىش ساپارىن اياقتادى، ال ە ع ا استروناۆتى ءۇشىن بۇل ەكسپەديتسيا ءۇشىنشى بولىپ وتىر.
ايتا كەتەلىك، بۇرىن حابارلاعانىمىزداي، پاولو نەسپوليدىڭ باستاماسىمەن جۋىردا ح ع س- دا تاڭعاجايىپ ەكسپەريمەنت جۇرگىزىلدى - عارىشكەرلەر سالماقسىزدىق جاعدايىندا العاش رەت يتالياندىق پيسسا ازىرلەپ كورگەن بولاتىن.
