يليا يلين «سىر جاناشىرى» اتاندى

شارعا ەلىمىزدىڭ تۇكپىر-تۇكپىرىنەن ءارتۇرلى سالادا تابىستى ەڭبەك ەتىپ جۇرگەن قىزىلوردالىقتار ارنايى كەلىپ قاتىستى. ايماقتىڭ دامۋىنا قوسقان ۇلەستەرى ءۇشىن سىر ەلىنىڭ ءبىرقاتار تۋمالارىنا «سىر جاناشىرى» ماراپاتى تابىستالدى.

ولاردىڭ ىشىندە ايگىلى زىلتەمىرشى يليا يلين مەن كارديوحيرۋرگ، قازاقستاننىڭ ەڭبەك ەرى يۋري پيا، «ا. ن. سىزعانوۆ اتىنداعى حيرۋرگيا عىلىمي زەرتتەۋ ورتالىعى» ا ق باسقارما ءتوراعاسى بولاتبەك بايماحانوۆ جانە ت. ب. بار.

وبلىس اكىمى قىرىمبەك كوشەربايەۆ فورۋمعا ارنايى كەلگەن ەلدىڭ جاناشىر ازاماتتارىنا العىسىن جەتكىزىپ، جىلى لەبىزىن ءبىلدىردى.

«مەملەكەت باسشىسى ءوزىنىڭ كورەگەن ساياساتىمەن ۇلتتىق قۇندىلىقتارىمىزعا نەگىزدەلگەن رۋحاني جاڭعىرۋدى الدىمىزعا قويدى. رۋحاني جاڭعىرۋدىڭ ءبىر تاراۋى «تۋعان جەرگە تاعزىم» بولسا، بۇل ءبىزدىڭ وڭىردە 2014-جىلدان بەرى جۇزەگە اسىپ كەلەدى. جۇرەگى ەلىم دەپ سوققان ءار ازامات «تۋعان جەر» باعدارلاماسىن جۇزەگە اسىرۋعا ۇلەس قوسۋى كەرەك دەپ بىلەمىن.

سىر وڭىرىندە «تۋعان جەرگە تاعزىم» اكسياسى باستاۋ العان كۇننەن باستاپ 400 گە جۋىق جوبا جۇزەگە اسىرىلىپ، 6 ميلليارد 228 ميلليون تەڭگە قارجى ءبولىندى. بۇل - ەلىن سۇيگەن، جەرىن قاستەرلەگەن ازاماتتاردىڭ اتامەكەننىڭ دامۋىنا قوسقان ۇلەسى. بۇگىن، مىنە، سول ازاماتتاردىڭ ءبىرقاتارىن «سىر جاناشىرى» اتاعىمەن ماراپاتتاعىمىز كەلىپ وتىر»، - دەدى ايماق باسشىسى.

بۇگىنگى شارادا عالىمدار، دارىگەرلەر مەن ونەر مايتالماندارى، كاسىپكەرلەر، سپورتشىلار جانە باسقا دا سالالاردىڭ وكىلدەرىنەن 19 ادام ماراپاتتالدى.

سونداي-اق، فورۋمدا قازاقستاننىڭ ەڭبەك سىڭىرگەن قايراتكەرلەرى - سۋرەتشى اعىمسالى دۇزەلحانوۆ، جىراۋ الماس الماتوۆ پەن الماتى ونكولوگيالىق ورتالىعىنىڭ باس دارىگەرى دامير داۋلەتبايەۆ ءسوز سويلەپ، جەرلەستەرىن مەرەكەمەن قۇتتىقتادى.

شارا سوڭى قازاق ەستراداسىنىڭ بەلگىلى ونەرپازدارى جەڭىس ىسقاقوۆا، تورەعالي تورەالى مەن «تۇران» تريوسىنىڭ كونسەرتتىك باعدارلاماسىنا ۇلاستى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى