بەردىبەك ساپاربايەۆ وقۋشىلارعا اكىم بولۋدىڭ جولىن ايتىپ بەردى
اقتوبە وبلىسى، مارتوك اۋدانى، سارىجار اۋىلىنىڭ وقۋشىلارى بۇرىن ءدالىزدى كابينەت ەتىپ جاساقتاپ، ءۇش اۋىسىمدا ءبىلىم الدى. جىل وتكەن سايىن حالىق سانى ارتىپ، تاياۋدا 800 جەر تەلىمى پايدالانۋعا بەرىلدى. مەكتەپ ماسەلەسى ەكى جىلدا شەشىمىن تاۋىپ، بۇگىن بالالاردىڭ ءبىر بولىگى جاڭا مەكتەپكە قونىس اۋداردى.
«ەسكى مەكتەپتە 1 مىڭعا جۋىق بالا ءبىلىم الدى. ءارى مەكتەپ جانىندا بالالارعا ارنالعان شاعىن ورتالىق بار. مەكتەپ اۆتوبۋسى اۋىل ءىشىن ارالاپ، شالعاي تۇراتىن وقۋشىلاردى تاسىمالدادى. ورىن تاپشىلىعىنان دالىزدەر جابىلىپ، سىنىپتارعا بەرىلدى. مۇعالىمدەر بولمەسى بولمادى. ەندى بۇل ماسەلەلەر ارتتا قالىپ، جاڭا مەكتەپ ءۇشاۋىسىمدى مەكتەپ ماسەلەسىن شەشىپ وتىر» ، - دەدى سارىجار ورتا مەكتەبىنىڭ ديرەكتورى ادىلبەك ءتاجىباي.
جاڭا مەكتەپ العاشقى جىلدارى ءبىر اۋىسىمدا جۇمىس ىستەيدى. بارلىعى 350 وقۋشى جاڭا مەكتەپكە كوشىرىلمەك.
«ەسكى مەكتەپتە جۇرگەندە كەشكى ساعات 7:20 دا ساباقتان شىعاتىن ەدىك. مەكتەبىمىز الىس بولدى. ال جاڭا مەكتەپتە ءماجىلىس زالى ەرەكشە، ءار ءپاننىڭ ءوز كابينەتى بار. ءبىز مۇنداي جاعدايدى بۇرىن كورمەدىك» ، - دەيدى 8 - سىنىپ وقۋشىسى نۇرجاۋ بالتابايەۆ.
جاڭا مەكتەپتىڭ قۇرىلىس جۇمىستارىنا 700 ميلليون تەڭگەگە جۋىق قارجى ءبولىندى. 9 ايدا قۇرىلىس جۇمىسى اياقتالىپ، پاندىك كابينەتتەر جاڭا قۇرال- جابدىقپەن تۇگەل قامتىلدى. مۇندا اۆتونومدى جىلۋ قازاندىعى بار. جاڭا عيماراتقا كوشكەن وقۋشىلاردى قۇتتىقتاعان وبلىس اكىمى بەردىبەك ساپاربايەۆ ولارعا ءبىلىمدى ادام عانا ۇلكەن بيىكتەردى باعىندىراتىنىن جەتكىزدى.
«بالالار دوستارىنان، قۇربى- قۇرداستارىنان قالىپ قويماي، زامان تالابىنا ساي ءبىلىم الۋى كەرەك. اتا- انا «مەكتەپتە ءمۇعالىم بار، وقىتادى» دەپ بالاسىنا نەمقۇرايلى قاراماۋى ءتيىس. قازىرگى زاماندا ءبىلىمىڭ بولماسا، جان- جاقتى دامىماساڭ ءومىڭ ءسۇرۋىڭ قيىن بولادى. بالالار، كوپ وقۋ قاجەت. تەلەفونعا كوپ قاراماي، گازەت، كىتاپ وقىعان دۇرىس. كەيىنگى جىلدارى بالالار شىعارما، مازمۇندامانى عالامتوردان كوشىرۋگە اۋەس. ول كەزدە ادام ويلانبايدى، ءبارىن دايىن كۇيىندە پايدالانادى. بالالار جاقسى ءبىلىم السىن دەگەن تىلەكپەن مەكتەپتەر سالىنىپ جاتىر. ۋاقىت تەز وتەدى. ەگەر جوعارى وقۋ ورنىنا تۇسە الماسا، بىرەۋدىڭ ءۇيىن تازالاپ، مالىن باعىپ، كولىگىن ايتىپ جۇرەسىڭدەر. ال جاقسى وقىعان بالا اكىم، مينيستر، عالىم بولا الادى. سوندىقتان وقىڭدار، وقىساڭدار ءبارى بولادى» ، - دەدى بەردىبەك ساپاربايەۆ.
ايتا كەتەيىك، اقتوبە وبلىسىندا ءۇش اۋىسىمدا ءبىلىم بەرەتىن 24 ورتا مەكتەپ بار. 2017 -جىلى 31 مەكتەپتىڭ قۇرىلىسى ءجۇرىپ، ونىڭ 11 ءى پايدالانۋعا بەرىلدى. ەكى اپتادا تاعى 4 مەكتەپ ىسكە قوسىلادى. اقتوبە وبلىستىق ءبىلىم باسقارماسىنىڭ باسشىسى ءلاززات ورازبايەۆانىڭ ايتۋىنشا، وڭىردە قابىرعاسى اعاشتان تۇرعىزىلعان 16, قامىستان سالىنعان 5 مەكتەپ بار. سامان كىرپىشتەن قالانعانى - 34.
