تاۋەلسىزدىك كۇنىنە ارنالعان وتشاشۋ استانانىڭ ءۇش اۋدانىندا بولادى

مەرەكەلىك وتشاشۋدى استانانىڭ ءۇش اۋدانىندا تاماشالاۋعا بولادى، دەپ حابارلايدى قازاقپارات ەلوردا اكىمدىگىنىڭ مەديا ورتالىعىنا سىلتەمە جاساپ.

استانا قالاسىنىڭ مادەنيەت، مۇراعاتتار جانە قۇجاتتاما باسقارماسىنان ءمالىم ەتكەندەي، 14 جانە 17 جەلتوقسان كۇندەرى «استانا» كونسەرت زالىندا سيمفونيالىق وركەسترى مەن «سارى ارقا» حالىق اسپاپتارى انسامبلىنىڭ كونسەرتتەرى وتەدى. ال 16 -جەلتوقسان كۇنى ساعات 19:30-دا «ءان مەن ءانشى» («استانا» كونسەرت زالى) مەرەكەلىك كونسەرتى كورەرمەندەرگە كوتەرىڭكى كوڭىل-كۇي سىيلايتىن بولادى.

استانا تەاترلارىنىڭ دا ءوز كورەرمەندەرىنە ازىرلەگەن تارتۋى بار. ماسەلەن، «جاستار» تەاترىندا 14 -جەلتوقساندا قىرعىز جازۋشىسى جانىش قۇلمامبەتوۆتىڭ دراماسىنىڭ جەلىسى بويىنشا «جاساۋىل» قويىلىمىنىڭ تۇساۋكەسەرى وتەدى. ق. قۋانىشبايەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىندا 16 -جەلتوقسان كۇنى «ابىلايحاننىڭ ارمانى» اتتى تاريحي دراما كورەرمەننىڭ نازارىنا ۇسىنىلادى، وسى كۇنى م. گوركي اتىنداعى مەملەكەتتىك اكادەميالىق ورىس دراما تەاترىندا ەكى سپەكتاكل كورسەتىلەدى - «براتەتس ليس ي براتەتس كروليك» ەرتەگىسى مەن ەرەسەكتەرگە ارنالعان «ماستەر ي مارگاريتا» ەكلەتيكاسى. مۇنىمەن قوسا، مەرەكە كۇندەرى بالالار قۋىرشاق تەاترىندا «اتامەكەن» ەرتەگىسىن تاماشالايدى.

بۇدان بولەك، اشىق الاڭداردا قازاقستاندىق ەسترادا جۇلدىزدارىنىڭ قاتىسۋىمەن ۇلكەن كونسەرتتەر وتەدى. 16 -جەلتوقساندا الىشەر كارىموۆ، ءالي وقاپوۆ، اعايىندى جۇگىنىسوۆتەر، مارجان اراپبايەۆا، اسقار جۇنىسبەك، «ارتدومبىرا» تريوسى ونەر كورسەتەدى. مەرەكەلىك شارالار قالالىق الاڭدا جانە «بايتەرەك» مونۋمەنتىنىڭ جانىنداعى الاڭدا وتەدى. باستالۋى - ساعات 18:00-دە.

سونىمەن قاتار، ەلوردا تۇرعىندارى مەن قوناقتارىنىڭ نازارىنا مەرەكەلىك وتشاشۋ ۇسىنىلادى. وتشاشۋ 16 -جەلتوقسان كۇنى ساعات 22:00-دە ەسىل وزەنىنىڭ جاعالاۋىندا، «حان شاتىر» ساۋدا ويىن-ساۋىق ورتالىعى جانىندا جانە ابىلايحان داڭعىلى مەن پۋشكين كوشەلەرىنىڭ قيىلىسىنداعى گۇلباقتا ۇيىمداتىرىلادى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى