اسانالى ءاشىموۆ: ۇلىمدى فيلم رولىنە دايىنداۋ ءۇشىن قارا سۋ مەن نان بەرىپ ابدەن جۇدەتتىم
كوزىن قىزارتۋدىڭ ءوزى وڭايعا تۇسپەدى. ءۇش مەزگىل تاعامىن ۋاقىتىنان كەشىكتىرمەي جەپ جۇرگەن بالانى جۇدەتىپ- جاداتۋ ءۇشىن بىرنەشە اپتا بويى قارا سۋ، قارا نانعا قامادىم. كوزىنىڭ بولاتى قاشىپ، ابدەن السىرەگەنىن كورگەن كىسىنىڭ جانى اشيتىنداي كۇيگە جەتتى.
«تىم بولماسا، اپتاسىنا ءبىر رەت تويىپ تاماق ىشەيىنشى»، - دەپ جالىناتىن بولدى. بەزەرىپ الدىم. كونبەيمىن. جاق ءجۇنى ءۇرپيىپ، جۇدەۋىن جۇدەدى- اۋ، ءبىراق كوزى قىزارمايدى. ونى گريمدەپ قىزارتا المايسىڭ. مونشانىڭ ىستىق بۋىنا دا قامايمىن، ءتىپتى ءىشىن جۇرگىزەتىن ءدارى دە بەرىپ كوردىم، ءبارىبىر كوزى قىزارمايدى. اقىرى بولماعان سوڭ، تاڭ اتقانشا سەناريدىڭ ءسوزىن پىسىقتاتقان بولىپ، تۇنگى ساعات ۇشكە دەيىن ۇيقى بەرمەي، تاڭ بوزىنان قايتادان وياتاتىن بولدىم. ءوزىم دە جۇدەپ- جادادىم. اقىرى ءبىر كۇنى بالام مۇرتتاي ۇشىپ، قاتتى اۋىردى. ىستىعى كوتەرىلگەن كەزدە ەكى كوزى قانتالاپ شىعا كەلىپتى.
«اكە، ولتىرسەڭ دە قوزعالار شامام جوق»، - دەپ، ۇل جىلامسىرايدى. سول كەزدە قاجەتتى ەپيزودتاردى ءتۇسىرىپ ۇلگەردىك.
بالامنىڭ از كۇن قينالىپ، دەنساۋلىعىنا تىرناقتاي بولسا دا زيان كەلتىرىپ السام دا، ول «قۇرباندىقسىز ونەر بولمايدى» دەيتىن قاعيدانىڭ ءبىر كورىنىسى بولار.
