پاۆلوداردا تەلەفون ارقىلى الاياقتىق جاساۋدىڭ جاڭا ءتۇرى پايدا بولدى
الاياق تەلەفون ارقىلى قوناق ءۇيدىڭ اسپازىن تاقىرعا وتىرعىزىپ كەتكەن، دەپ حابارلايدى «قازاقپارات» ح ا ا ءتىلشىسى.
پاۆلودار وبلىسىنىڭ ءى ءى د باسپا ءسوز قىزمەتى تەلەفون ارقىلى الاياقتىق جاساۋدىڭ جاڭا ءتۇرى پايدا بولعانىن حابارلايدى. ۆەدومستۆونىڭ رەسمي مالىمەتىنە سۇيەنسەك، پاۆلوداردا قوناق ۇيلەردىڭ ءبىرىنىڭ اكىمشىلىك تەلەفونىنا حابارلاسىپ، ءوزىن «دميتري ۆاسيليەۆيچپىن» دەپ تانىستىرعان ادام ەكى ءنومىردى بروندايتىنىن ايتقان. سويلەسۋ كەزىندە ول ءوزى تاپسىرىس بەرگەن نومىرلەرگە ەكى بوتەلكە فرانسۋز كونياگىن، شامپان، جەمىس پەن قىمبات كونفەتتەردى قالدىرۋىن وتىنگەن.
«تاپسىرىستى ورىنداۋ ءۇشىن 100000 تەڭگە كولەمىندەگى اقشامەن قوناق ءۇيدىڭ اسپازى سۋپەرماركەتكە جىبەرىلگەن. دۇكەندە قىمبات سۋسىندار بولماي قالىپ، بۇل جايىندا «دميتري ۆاسيليەۆيچكە» ۇيالى تەلەفون ارقىلى حابارلانادى. ول وسى ماسەلەنىڭ رەستوران اكىمشىلىگىمەن شەشىلگەنىن ايتىپ، قارجىنى (اسپازعا - اۆت. ) «كيۆي كوشەلەك» تەرمينالى ارقىلى جولداۋدى سۇرايدى. قارجى جولدانعاننان كەيىن ابونەنتتىك ءنومىر سوندىرىلگەن. وسى ورايدا بەلگىسىز تۇلعا 100000 تەڭگە كولەمىندەگى قارجىنى يەلەنىپ، جابىرلەنۋشىلەرگە پوليتسياعا ارىز بەرۋگە تۋرا كەلدى»، - دەلىنگەن حابارلامادا.
اتالعان جاعداي بويىنشا الاياقتىق بابىمەن تەرگەۋ جۇمىستارى باستالعان. قىلمىس جاساۋعا قاتىسى بار تۇلعالاردى انىقتاۋ مەن ۇستاۋعا باعىتتالعان تەرگەۋ جانە ىزدەۋ ءىس-شارالارى جۇرگىزىلۋدە. پوليتسيا تۇرعىنداردى الاياقتاردىڭ تۇزاعىنا ىلىنبەۋگە جانە اباي بولۋعا شاقىرادى.
