مينيستر قاي ەلدەردەن اكەلەتىن ويىنشىقتاردىڭ زياندى ەكەنىن ايتتى

بۇل تۋرالى بۇگىن ۇكىمەت وتىرىسىندا ايتىلدى، دەپ حابارلايدى Sputnik قازاقستان ءتىلشىسى.

دەنساۋلىق ساقتاۋ مينيسترلىگى اي سايىن حالىق ءجيى تۇتىناتىن تاۋارلاردى ساتىپ الىپ، ارنايى زەرتحانالاردا تەكسەرىپ وتىرادى. جىل باسىنان بەرى 38 مىڭنان استام ءونىمنىڭ ساپاسى زەرتتەلگەن.

«تاماق ونىمدەرىنىڭ 7,3 پايىزى تالاپقا ساي ەمەس بولىپ شىقتى. سونىڭ باسىم بولىگى - شەتەلدەن كەلەتىن تاۋارلار. جالپى، 172 مىڭ توننادان استام تاۋارلار ۋتيليزاتسياعا جىبەرىلدى. سەبەبى حالىق دەنساۋلىعىنا زياندى. اتالعان تاۋارلاردىڭ ىشىندە بالالارعا ارنالعان ونىمدەر دە از ەمەس. وسى ورايدا ويىنشىقتاردىڭ 36,6 پايىزى بالالار ءۇشىن زياندى ەكەنىن ەرەكشە اتاپ وتكەن ءجون. ونداي ويىنشىقتاردىڭ قۇرامىندا ۋلى زاتتار، يا بولماسا، جاراقات سالۋ ءقاۋپى بار. ونداي ويىنشىقتاردىڭ باسىم بولىگى قىتاي مەن تۇركيادان جەتكىزىلەدى»، - دەدى دەنساۋلىق ساقتاۋ ءمينيسترى ەلجان ءبىرتانوۆ ۇكىمەت وتىرىسىندا.

ايتۋىنشا، تەكسەرىستەر كەزىندە سىرتتان تاۋار تاسىپ جۇرگەن 50 كاسىپكەر انىقتالعان. ولار 52 مىڭنان استام تاۋار ءتۇرىن الىپ كەلىپتى. سونىڭ ىشىندە جەڭىل ونەركاسىپ تاۋارلارى، ويىنشىقتار مەن تاماق ونىمدەرى بار.

جالپى، تەكسەرىستەردىڭ ناتيجەسى بويىنشا 107 سوت شەشىمى شىعارىلىپ، 20 ميلليون تەڭگەگە ايىپپۇلدار سالىنعان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى