ورالداعى تەاترعا حاديشا بوكەيەۆانىڭ، مادەنيەت ورتالىعىنا قادىردىڭ ەسىمى بەرىلدى
بۇل تۋرالى Twitter جەلىسىندە باتىس قازاقستان وبلىسىنىڭ اكىمى التاي كولگىنوۆ جازدى. «بۇگىن ۇكىمەت وتىرىسىندا ءتيىستى قاۋلى قابىلداندى. قۇتتى بولسىن!»، دەپ، اق جايىق جۇرتشىلىعىن قۇتتىقتاعان ءوڭىر باسشىسى بيىل ك س ر و جانە قازاقستاننىڭ حالىق ءارتىسى، مەملەكەتتىك سىيلىقتىڭ يەگەرى حاديشا بوكەيەۆانىڭ 100 جىلدىعى تويلانعانىن ەسكە سالدى.
سونىمەن قاتار وبلىس باسشىسى التاي كولگىنوۆ ۇكىمەت قاۋلىسىنا سايكەس باتىس قازاقستان وبلىستىق مادەنيەت جانە ونەر ورتالىعىنا اقيىق اقىن قادىر مىرزا-ءاليدىڭ، ورالداعى №30 -ورتا مەكتەپكە قازاقتىڭ تۇڭعىش ۇشقىش قىزى، حالىق قاھارمانى حيۋاز دوسپانوۆانىڭ ەسىمى رەسمي تۇردە بەرىلگەنىن حابارلادى.
