قازاق كۇرەسىنەن «ەۋرازيا بارىسى» وتەدى

بۇعان دەيىن حالىقارالىق تۋرنير رەتىندە وتكەن جارىس وسىمەن بەسىنشى رەت جالاۋىن جەلبىرەتپەك. ءۇش جىل تاراز قالاسىندا ۇيىمداستىرىلعان «ەۋرازيا بارىسى» بيىل ەكىنشى رەت وڭتۇستىك استانادا وتكىزىلگەلى وتىر.

جىل سايىن ءداستۇرلى جارىسقا گرۋزيا، موڭعوليا، رەسەي، پولشا، تۇركيا، قىرعىزستان تاعى باسقا كوپتەگەن ەلدىڭ بىلەكتى بالۋاندارى باق سىناپ كەلەدى. سونىڭ ىشىندە قازاقستان قۇراماسى اتالمىش كوماندالىق جارىستا ءۇش رەت توپ جاردى، تەك 2014-جىلى عانا موڭعوليا قۇراماسى قارسىلاس شاق كەلتىرمەدى.

بيىل «ەۋرازيا بارىسىنا» برازيليا، جاپونيا جانە كامەرۋن ەلدەرى تۇڭعىش رەت قاتىسادى. سونىمەن قاتار، جارىسقا وزبەكستان، تۇركيا جانە قازاقستاننىڭ قوس كومانداسى باق سىنايدى.

قاتىسۋشىلار اراسىندا ناتيجەلى سپورتشىلار از ەمەس. سامبودان الەم چەمپيونى پااتا گۆينياشۆيلي (گرۋزيا)، د. التانگەرەل موڭعوليانىڭ ۇلتتىق كۇرەسى بويىنشا «ارىستان» اتاعىنىڭ يەگەرى، بيىل استانادا وتكەن قازاق كۇرەسىنەن الەم چەمپيوناتىنىڭ كۇمىس جۇلدەگەرى ر. سونمەس (تۇركيا)، قازاق كۇرەسىنەن كوپتەگەن حالىقارالىق جارىستاردىڭ جۇلدەگەرى جانە كۋراشتان الەم چەمپيونى مۋحسين حيسوميددينوۆ (وزبەكستان)، دزيۋدودان جاپونيا چەمپيونى ك. تانيۋ جانە تاعى باسقالارى بار.

قازاقستان كومانداسى بيىل ەكى قۇراممەن بوز كىلەمگە شىعادى. بالۋاندار الماتىدا ەكى اپتالىق وقۋ-جاتتىعۋ جيىنىن وتكىزۋدە. جيىن قورىتىندىسى بويىنشا باپكەرلىك كەڭەس «ەۋرازيا بارىسىنا» قاتىساتىن سپورتشىلاردى انىقتايدى.

«ەۋرازيا بارىسىندا» ءار كوماندادا سەگىز بالۋاننان كۇرەسەدى. سپورتشىلار 55 كەلى، 60 كەلى، 66 كەلى، 74 كەلى، 82 كەلى، 90 كەلى، 100 كەلى جانە 100+ كەلى سالماق دارەجەلەرى بويىنشا مىقتىنى انىقتايدى.

ءداستۇر بويىنشا جارىستىڭ قوماقتى جۇلدە قورى بار.

1 ورىن - 10000000 تەڭگە

Ⅱ ورىن - 6000000 تەڭگە

Ⅲ ورىن - 4000000 تەڭگە

«ەۋرازيا بارىسى» قازاقستان ايماعىندا «Qazaqstan» جانە «Qazsport»، تۇركيانىڭ «TRT Avaz»  تەلەارنالارىندا تىكەلەي ەفيردە كورسەتىلەدى. سونىمەن قاتار، رەسەيدىڭ «بوكس ت ۆ» جانە «ماتچ! پلانەتا» تەلەارنالارىنىڭ ەفيرىنەن دە قايتالانادى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى