قارجى ءمينيسترى: بيۋدجەت دەڭگەيلەرىندە كىرىستىڭ ءوسىمى بولادى

بۇل تۋرالى ۇكىمەت وتىرىسىندا ق ر قارجى ءمينيسترى باقىت سۇلتانوۆ ايتتى، دەپ حابارلايدى قازاقپارات.

«بىلتىرعى جىلدىڭ 11-ايىنىڭ قورتىندىسىمەن سالىستىرعاندا كىرىستەر 520 ميلليارد تەڭگەگە ارتىق ءتۇستى. وتكەن جىلدىڭ وسىعان ۇقساس كەزەڭىمەن سالىستىرعاندا مەملەكەتتىك بيۋدجەت شىعىستارىنىڭ تازا ءوسىمى 815 ميلليارد تەڭگەنى قۇرادى. بيۋدجەت قاراجاتىن يگەرۋ ماسەلەلەرىن قاداعالاۋ بارىسىندا اعىمداعى جىلدىڭ ەكىنشى جارتىجىلدىعىنان باستاپ 7 سەلەكتورلىق كەڭەس وتكىزىلدى. وسى جۇمىستاردىڭ ناتيجەسىندە شىعىستاردىڭ يگەرۋ پايىزى جوعارى بولادى دەپ كۇتىلۋدە»، - دەپ اتاپ ءوتتى مينيستر.

 ب. سۇلتانوۆتىڭ سوزىنشە، بيۋدجەتتىڭ اتقارىلۋىن باقىلاۋ بارىسىندا پريەۆەنتيۆتىك شارالار كەڭىنەن قولدانىلدى.

 «مەملەكەتتىك بيۋدجەتكە 6,3 تريلليون تەڭگە كىرىس (ترانسفەرتتەرسىز) ءتۇستى. مەملەكەتتىك بيۋدجەت بويىنشا ارتىعىمەن ورىنداۋ سوماسى 153 ميلليارد تەڭگەنى، رەسپۋبليكالىق بيۋدجەت بويىنشا - 71 ميلليارد تەڭگەنى جانە جەرگىلىكتى بيۋدجەت بويىنشا 82 ميلليارد تەڭگەنى قۇرادى. تۇتاستاي العاندا، مەملەكەتتىك بيۋدجەت كىرىستەرى 102,5 پايىزعا، رەسپۋبليكالىق بيۋدجەت كىرىستەرى - 101,6 پايىزعا جانە جەرگىلىكتى بيۋدجەت كىرىستەرى 104,5 پايىزعا اتقارىلدى»، - دەپ ناقتىلادى ۆەدومستۆو باسشىسى.

بەلگىلى بولعانداي، رەسپۋبليكالىق بيۋدجەتكە جىل قورىتىندىسى بويىنشا 4 تريلليون  989,6  ميلليارد تەڭگە ءتۇسۋى بولجانىپ وتىر. بۇل كورسەتكىش 100,7 پايىزدى قۇرايدى، ياعني جوسپاردان 36,8 ميلليارد تەڭگە ارتىق بولادى.

«شىعىستار بويىنشا ورىندالۋ پايىزى وتكەن جىلعى كورسەتكىشتەرگە قاراعاندا جاقسى. مەملەكەتتىك بيۋدجەت بويىنشا وتكەن جىلدىڭ وسىنداي كەزەڭىنە قاراعاندا 0,7 پايىزعا، رەسپۋبليكالىق جانە جەرگىلىكتى دەڭگەيدە 0,4 پايىزعا جاقسى ورىندالدى. جالپى مەملەكەتتىك بيۋدجەتتىڭ شىعىستارى 97,6 پايىزعا، رەسپۋبليكالىق بيۋدجەتتىڭ شىعىستارى 98,6 پايىزعا جانە جەرگىلىكتى بيۋدجەتتەردىڭ شىعىستارى 97,0 پايىزعا اتقارىلدى»، - دەپ اتاپ ءوتتى باقىت سۇلتانوۆ.

اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى