قازاقستاندا ەرەسەكتەرسىز بالالار مەشىت پەن شىركەۋگە بارا المايدى
بۇل تۋرالى بۇگىن ق ر ءدىن ىستەرى جانە ازاماتتىق قوعام ۆيتسە- ءمينيسترى بەرىك ارىن ءمالىم ەتتى، دەپ حابارلايدى قازاقپارات.
ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ۆەدومستۆو وكىلىنە «بالالار وزدەرى جالعىز مەشىت پەن شىركەۋگە بارا الا ما؟» دەگەن ساۋال قويىلدى.
«بۇل نورمادا مىندەتتى تۇردە ەرەسەك ادامداردىڭ ءبىرى بالانىڭ جانىندا بولۋى ەسكەرىلگەن. ناقتىراق ايتقاندا، اتا- انانىڭ ءبىرى، كامەلەتكە تولعان جاقىن تۋىستارى، ياعني اعالارى مەن اپكەلەرى، اتاسى مەن اجەسى، سونداي- اق زاڭدى وكىلدەرى بولۋى كەرەك. وسى ورايدا مىندەتتى تالاپتىڭ ءبىرى - ول اتا- انانىڭ ءبىرى قارسى بولماۋى ءتيىس»، - دەپ ءتۇسىندىردى ول تىلشىلەر ساۋالىنا جاۋاپ بەرۋ كەزىندە.
ب. ارىننىڭ سوزىنشە، بۇل نورما بالالاردى ءدىني سيپاتتاعى دەسترۋكتيۆتى ىقپالدان قورعاۋعا ارنالعان.
سونىمەن قاتار، وسى نورما ءدىني بىرلەستىكتەر جەتەكشىلەرى ءۇشىن جاۋاپكەرشىلىكتى جۇكتەپ وتىر.
«اتالعان تالاپتارسىز كامەلەتكە تولماعانداردىڭ عۇرىپتارعا قاتىسۋىنا جول بەرمەۋ بويىنشا ولار ءتيىستى شارالاردى قابىلداۋعا مىندەتتى بولادى»، - دەدى ۆيتسە- مينيستر.
وسى ورايدا ءدىني بىرلەستىك زاڭنان ءۇزىندىنى ءىلىپ قويۋ كەرەك نەمەسە ۋاعىز ايتۋ كەزىندە قاجەتتى اقپاراتتى بەرۋى قاجەت.
اۆتور: رۋسلان عابباسوۆ
