اراب ەلدەرى ا ق ش- تى يەرۋساليم جونىندەگى شەشىمىن قايتارىپ الۋعا شاقىردى
اراب ەلدەرىنىڭ مالىمدەۋىنشە، بۇل جاعداي تاياۋ شىعىستا تارتىپسىزدىكتەرگە اكەپ سوقتىرۋى مۇمكىن، دەپ حابارلايدى BBC.
اراب مەملەكەتتەرى ليگاسىنىڭ سىرتقى ىستەر مينيسترلەرى ا ق ش- قا بۇدان بىلاي وڭىردە بەيبىتشىلىك ورناتۋ جونىندەگى سەنىمدى سەرىكتەس رەتىندە قاراۋعا بولمايتىنىن مالىمدەدى.
22 مەملەكەتتىڭ سىرتقى ىستەر مينيسترلەرى بۇل مالىمدەمەنى يوردان وزەنىنىڭ باتىس جاعالاۋى مەن گازا سەكتورىندا ءۇش كۇننەن بەرى نارازىلىق اكسيالارى تولاستاماي تۇرعان تۇستا جاريالادى.
ا ق ش تالاي جىلدان بەرى پالەستينا مەن يزرايل ءۇشىن وتە نازىك ماسەلەدە بەيتاراپ ساياسات ۇستانىپ كەلگەن بولاتىن، ءبىراق دونالد ترامپتىڭ سايلاۋ الدىنداعى ۋادەسىن ورىنداپ، يەرۋساليمدى يزرايل استاناسى دەپ جاريالاۋى بۇل ۇستانىمنان كۇرت شەگىنىس بولدى.
اراب ەلدەرى ليگاسىنىڭ قارارى بىرنەشە ساعاتتىق تالقىلاۋدان سوڭ قابىلداندى. وعان ءتىپتى ب ا ءا، ساۋد ارابياسى، يوردانيا سەكىلدى ا ق ش- تىڭ وداقتاستارى دا كەلىسىم بەرگەن.
قاراردا ا ق ش مۇنىمەن يزرايل- پالەستينا ماسەلەلەرىندەگى كەز كەلگەن بەيبىت پروتسەستەن «ۇيىمداستىرۋشى جانە بىتىمگەر رەتىندە ءوزىن-ءوزى شەتتەتكەنى» ايتىلادى.
يزرايل يەرۋساليمدى ءوزىنىڭ استاناسى دەپ سانايدى، ال پالەستينا شىعىس يەرۋساليمدى 1967-جىلعى سوعىس كەزىندە يزرايل جاۋلاپ الدى دەگەندى العا تارتادى.
يەرۋساليمدە يۋدايزم، يسلام جانە حريستيان دىندەرى ءۇشىن ماڭىزدى كيەلى جەرلەر بار. يزرايل 1967-جىلعى سوعىسقا دەيىن يوردانيانىڭ ەنشىسىندە تۇرعان شىعىس يەرۋساليمدى الدىمەن وككۋپاتسيالاپ، 1989-جىلى اننەكسيالادى. ءبىراق بۇنى حالىقارالىق قوعامداستىق مويىنداعان جوق.
شىعىس يەرۋساليمدە 330 مىڭ پالەستينالىق جانە 200 مىڭداي يەۆرەي تۇرادى. ولاردىڭ قونىستانۋى حالىقارالىق زاڭناماعا سايكەس زاڭسىز دەلىنەدى، الايدا يزرايل تاراپى ول ەلدى مەكەندەردى زاڭدى دەپ اتاۋمەن كەلەدى.
1993-جىلعى بەيبىت كەلىسىمگە سايكەس، يەرۋساليمنىڭ ستاتۋسى بەيبىت پروتسەستىڭ سوڭعى كەزەڭىندە شەشىلۋى ءتيىس ەدى.
2014-جىلى بەيبىت پروتسەستەردىڭ سوڭعى كەزەڭى تىعىرىققا تىرەلدى. ا ق ش جاڭا ۇسىنىستارىن بىلدىرگەنمەن، پالەستينا وكىلدەرى دونالد ترامپتىڭ جۋىرداعى شەشىمى ا ق ش- تى بەيبىت پروتسەستەردىڭ بىتىمگەرى رەتىندەگى رولىنەن ايىردى دەپ وتىر.
جۇما كۇنى ترامپتىڭ مالىمدەمەسىنە قاتىستى قاۋىپسىزدىك كەڭەسىنىڭ شۇعىل وتىرىسى شاقىرىلعان بولاتىن. وندا ەۋروپانىڭ بەس ەلى ا ق ش- تى ب ۇ ۇ قارارلارىن بۇزدى دەپ ايىپتادى.
