ورال تەاترىندا ايگىلى جەلتوقسان وقيعاسىنا ارنالعان درامانىڭ تۇساۋكەسەرى ءوتتى - فوتو
جەلتوقسان وقيعاسىنا ارنالعان، بارشا قازاق ەلىنىڭ جۇرەگىنە جارا سالعان ازالى كۇندەردى ارقاۋ ەتكەن سپەكتاكلدى قويعان رەجيسسەر سامال ءابۋوۆ جاڭاشا شەشىم تاپقان. سونداي-اق سۋرەتشى مۇرات مامبەتوۆ پەن بالەتمەيستەر قارلىعاش قادىربەكوۆانىڭ ەڭبەگى مول. باس كەيىپكەر، حالىق قاھارمانى قايرات رىسقۇلبەكوۆتىڭ رولىندە جاسقايرات ۆاليۋلليەۆ ويناسا، اناسى دامەتكەندى ەلميرا ماقاشيەۆا سومدادى. فاتيما ءرولىن اقجان ورىنباساروۆا اشسا، شەربانى تاليعات جىگەروۆ ءساتتى شىعاردى. ساحنا دەكوراتسياسى ۇتىمدى ءارى سپەكتاكل نەگىزىنەن جاستاردىڭ ويناۋىمەن ەرەكشەلەندى.
پرەمەراعا قاتىسقان وبلىس اكىمى التاي كولگىنوۆ تەاتر ۇجىمىنا ريزاشىلىعىن ءبىلدىردى.
تاۋەلسىزدىك مەرەكەسى قارساڭىندا قويىلعان سپەكتاكلدىڭ تۇساۋكەسەرىنە دراما اۆتورى ءسابيت دوسانوۆ، ونىڭ جارى، بەلگىلى عالىم، قازاقستاننىڭ ەڭبەك سىڭىرگەن قايراتكەرى قۇرالاي اققوشقاروۆا، جازۋشىنىڭ ءىنىسى، كاسىپكەر عابيت دوسانوۆ، ەلگە تانىمال اقىندار وتەگەن ورالبايەۆ، قازىبەك يسا ارنايى كەلدى.
قويىلىمعا س. دوسانوۆ جوعارى باعاسىن بەرىپ، باتىسقازاقستاندىق تەاتر ۇجىمىنا شىنايى العىسىن ايتتى. ءوزىنىڭ سوزىنە قاراعاندا، اۆتور اتالمىش تۋىندىنى جەلتوقسان وقيعاسى وتىسىمەن جازعان. الايدا وتكەن عاسىردا پەسانى قويۋعا تالپىنىستار بولعانىمەن، كوپكە دەيىن ءساتى تۇسپەگەن. كەدەرگىلەر دە بولماي قالماعان. تەك كىتاپقا باسىلىپ شىققاننان كەيىن عانا قىرعىز تەاترى العاش ساحنالادى. سودان كەيىن وڭتۇستىك قازاقستان وبلىستىق ج. شانين اتىنداعى اكادەميالىق قازاق دراما تەاترى قويدى. ءۇشىنشى بولىپ باتىس قازاقستاندىق تەاتر قولعا الدى.
«كەز كەلگەن دراماتۋرگيالىق تۋىندىنىڭ ءماتىن كۇيىندەگى نۇسقاسى ءبىر بولەك بولسا، سول كوركەمدىك الەمىن ساحنالىق جاندى قوزعالىسقا ەنگىزۋ ءۇشىن رەجيسسەرلىك شەشىم تابۋ دا وڭاي ەمەس. ونىڭ ۇستىنە اۆتوردىڭ ءوزى قاتىسىپ وتىرسا، جاۋاپكەرشىلىك ەكى ەسە ارتا تۇسەرى ءسوزسىز. قويۋشى رەجيسسەر سامال ءابۋوۆتىڭ ىزدەنىسى اۆتورعا جانە بارشا كورەرمەنگە اسەر ەتكەنى انىق بايقالدى. جەلتوقسان تاقىرىبى - تاۋەلسىز قازاقستان ءۇشىن ماڭگىلىك تاقىرىپ. بۇل ماسەلەنى قوزعاساق، قارالى دا قاسىرەتتى جىلداردىڭ ەلەسى سانامىزدى وسىپ وتەرى انىق. جەلتوقسان وقيعاسىن بۇگىنگى ۇرپاق كورگەن جوق، ءبىراق وسىنداي اقيقاتتى تۋ ەتكەن قالامگەرلەردىڭ تۋىندىلارى ارقىلى سانامىزعا سىڭىرە تۇسسەك، ۇتىلماسىمىز انىق.
تاريحتى ۇمىتپاۋ، وتكەننەن ساباق الىپ، تاۋبەگە كەلۋ، تاۋەلسىزدىك سىندى قاسيەتتى ۇعىمنىڭ قادىر-قاسيەتىن ۇلىقتاۋ وسىنداي شىنايى شارالاردان باستاۋ السا كەرەك. رۋحاني جاڭعىرۋ ءۇشىن شوۋ جاساماي- اق، وسىنداي ءماندى، ماعىنالى دۇنيەلەردى قولداۋ كەرەك. تەاتر ارتىستەرىنىڭ ۇيلەسىمدى قيمىلى، شەبەر ويىندارى جەلتوقسان كوتەرىلىسىنىڭ لەبىن انىق سەزدىردى. كەي تۇستاردا كوزگە ەرىكسىز جاس كەلدى. مىسالى، انا بولىپ اڭىراعان ەلميرا ماقاشيەۆا شىققاندا، تەرەڭ ويعا باتىردى. قويىلىمنان كەرەمەت اسەر الدىق»، - دەدى كورەرمەندەردىڭ ءبىرى، عالىم ايداربەك اقبولاتوۆ.
