الەم ساياتشىلارىنىڭ بۋرابايداعى ءتۋرنيرى: جەڭىمپاز انىقتالدى - فوتو
تاۋەلسىزدىك مەرەكەسى جانە اتاقتى قۇسبەگى ءماسىپ باتىرحان ۇلىنىڭ قۇرمەتىنە ۇيىمداستىرىلعان حالىقارالىق تۋرنيرگە قازاقستان، قىتاي، قىرعىزستان، موڭعوليا، ۆەنگريا جانە رەسەيدەن كەلگەن ساياتشىلار قاتىستى. جارىس بارىسىندا 41 بۇركىت، 4 قارشىعا جانە 4 سۇڭقار قۇسىنىڭ ەپتىلىگى مەن العىرلىعى سىنعا ءتۇستى.
ءتۋرنيردىڭ اشىلۋىنا اقمولا وبلىسى اكىمىنىڭ ورىنباسارى اينا ءمىسىرالىموۆا، قازاقستان رەسپۋبليكاسىنداعى مونعوليا مەملەكەتىنىڭ توتەنشە جانە وكىلەتتى ەلشىسى لۋۆسان باتتۋلگا، ۆەنگريا رەسپۋبليكاسىنىڭ توتەنشە جانە وكىلەتتى ەلشىسىنىڭ ورىنباسارى شاندو دوروگي جانە ەلىمىزدىڭ ۇلتتىق سپورت تۇرلەرى بويىنشا رەسپۋبليكالىق قاۋىمداستىقتىڭ وكىلدەرى قاتىستى.
باس جۇلدەگە اقمولا وبلىسى اكىمدىگى اتىنان تەمىر تۇلپار تىگىلدى. وعان قوسا، ق ر ۇلتتىق سپورت تۇرلەرى بويىنشا رەسپۋبليكالىق قاۋىمداستىق تاراپىنان 2 ميلليون تەڭگە قارجى ءبولىندى.
ناتيجەسىندە، باس جۇلدە - اۆتوكولىكتى اقمولا وبلىسىنىڭ ەڭبەكشىلدەر اۋدانىنان كەلگەن ساياتشى قانات شۇلەنبايەۆ جەڭىپ الدى. حالىقارالىق دودانىڭ وزگە دە جۇلدەگەرلەرى سىي-سياپاتتارعا يە بولدى.
تۋرنير جەڭىمپازدارى ءۇش كەزەڭ بويىنشا انىقتالدى. جاس بالالار سۇڭقار مەن قارشىعانى قولعا قوندىرۋدا شەبەرلىكتەرىن كورسەتسە، ۇلكەندەر بۇركىتپەن اڭ اۋلاپ، ءوزارا باق سىناستى. بابى كەلىسكەن قىراننىڭ قويان مەن تۇلكى تۇگىلى قاسقىر دا الاتىنى انىق. وسى رەتتە، قيادان قۇلديلاپ بارىپ جەمتىگىن ۇستاعان جانە يەسىنىڭ قولىنا كەلىپ قونعان بۇركىتتەردىڭ سايىسى كوپشىلىك كورەرمەننىڭ كوڭىلىنەن شىقتى. سونداي-اق، سۇڭقار مەن قارشىعا سايىسى دا تارتىستى ءوتتى.
جالپى، بۋراباي باۋرايىنا جينالعان جۇرتشىلىق حالقىمىزدىڭ ساياتشىلىق ونەرى مەن رۋحاني قۇندىلىقتارىمىزدى ۇلىقتاتقان شارادان زور اسەر الىپ قايتتى.
اۆتور: اسلان وسپانوۆ
