قازاقستاندىقتار پارا بەرۋدى ازايتتى - ساۋالناما
«Trancparency Kazakhstan» قوعامدىق قورى وتكىزگەن الەۋمەتتىك زەرتتەۋ وسىنى ايعاقتايدى، دەپ حابارلايدى قازاقپارات.
زەرتتەۋ ناتيجەسى قاراعاندى قالاسىندا وتكەن فورۋمدا جاريالاندى.
«ءبىز ارنايى زەرتتەۋ جۇرگىزدىك. وعان سايكەس، بۇرىن پارا بەرگەن ادامداردىڭ ۇشتەن ءبىرى ءوز كوزقاراسىن وزگەرتىپ، بىرەۋدىڭ الاقانىن مايلاۋدى قويدى. بۇنىڭ ءوزى ازاماتتاردىڭ جەمقورلىقتان اۋلاق جۇرۋگە تىرىساتىنىن كورسەتىپ وتىر. ولاردىڭ كوزقاراسى وزگەردى. «پارا بەرگەن دۇرىس ەمەس» دەگەن ناقتى ازاماتتىق ۇستانىم قالىپتاستى»، - دەدى قوردىڭ قامقورشىلىق كەڭەسىنىڭ ءتوراعاسى، قازاقستاننىڭ 2015-2025-جىلدارعا ارنالعان سىبايلاس جەمقورلىققا قارسى ستراتەگياسىنىڭ ارنايى مونيتورينگ توبىنىڭ مۇشەسى مارات شيبۋتوۆ.
قاراعاندى وبلىسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ باسشىسى جاندوس سارسەنوۆتىڭ ويىنشا، مۇنىڭ بارلىعى - جەمقورلىققا قارسى ءتيىمدى جۇمىستىڭ ناتيجەسى. پروفيلاكتيكا دا ءوز سەپتىگىن تيگىزىپ وتىر.
«ءبىز جوعارى وقۋ ورىندارىن ارالاپ، ستۋدەنتتەرگە سەسسيانى «اقشامەن شەشكەن» دۇرىس ەمەس ەكەندىگىن ۇنەمى ءتۇسىندىرىپ وتىرامىز. وقۋ ورىندارىندا ارنايى ومبۋدسمەندەر بار. ول قىزمەتتى دەپارتامەنت قىزمەتكەرلەرى اتقارادى. ولار ستۋدەنتتەر اراسىندا ءتۇسىندىرۋ جۇمىستارىن جۇرگىزەدى. وبلىس بويىنشا 120 باننەر ورناتىلدى. اۆتوبۋس ايالدامالارى مەن حالىق كوپ جۇرەتىن جەرلەردە داۋىس زورايتقىشتارى ارقىلى جەمقورلىقتىڭ قانشالىقتى زيان ەكەنىن ءتۇسىندىرىپ تۇرامىز»، - دەپ اتاپ كورسەتتى سارسەنوۆ.
ايتا كەتەيىك، 9- جەلتوقساندا الەم ەلدەرى حالىقارالىق جەمقورلىققا قارسى كۇنىن اتاپ وتەدى. 2001-جىلى مەكسيكادا وتكەن ب ۇ ۇ- نىڭ بۇكىل الەمدىك كونفەرەنسياسىندا ءتيىستى كونۆەنتسيا قابىلدانعان بولاتىن.
