الماتى اۋەجايىندا ۇشاق جولاقتان شىعىپ كەتتى

توتەنشە جاعداي سالدارىنان بىرنەشە رەيستىڭ كەستەسى بۇزىلدى، دەپ حابارلايدى قازاقپارات ءتىلشىسى.

«الماتى- بانگكوك باعىتىنداعى رەيس ۇشاعى دوڭگەلەكتەردىڭ جەر بەتىمەن ۇيكەسپەۋىنىڭ كەسىرىنەن قوزعالتقىشتاردىڭ ريەۆەرس كۇشىمەن جولاق سىرتىنا شىعىپ توقتاۋعا ءماجبۇر بولدى. ۇشاقتىڭ تەجەگىش جۇيەسى ىستەن شىققان جوق. اۋە كەمەسى ارنايى تەحنيكانىڭ كومەگىمەن تۇراققا قويىلدى. تەحنيكالىق قاراۋدان سوڭ ۇشاقتى ارى قاراي پايدالانۋ مۇمكىندىگى قاراستىرىلادى»، - دەدى اۋە كومپانياسىنىڭ باسپا ءسوز قىزمەتى.

باسپا ءسوز قىزمەتىنىڭ حابارلاۋىنشا، بانگكوككە جەتۋى ءتيىس جولاۋشىلار باسقا اۋە كەمەسىمەن 7:35 تە ۇشىپ كەتتى.

بۇل توتەنشە جاعداي ءبىرقاتار رەيستەردىڭ كەستەسىنىڭ بۇزىلۋىنا سەبەپ بولدى.

استانا اۋەجايىنىڭ ونلاين تابلوسىندا كورسەتىلگەندەي، قازىر ەلوردادان 11 رەيس ۋاقىتىنان كەشىگىپ وتىر.

ال الماتى اۋەجايىندا دا 10 عا جۋىق رەيس كەشىگىپ، 4 رەيس توقتاتىلعان.

اۋە كومپانياسى جولاۋشىلارعا airastana.com سايتى ارقىلى رەيستەردىڭ مارتەبەسىن باقىلاپ وتىرۋعا كەڭەس بەرىپ وتىر.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى