دومبىراشى ەرمەك قازيەۆتىڭ كەشىندە سيرەك ورىندالاتىن كۇيلەر كۇمبىرلەدى
ءوزىنىڭ 70 جاسقا تولۋىنا ارنالعان شارا بارىسىندا بوكەي ورداسى اۋدانىنىڭ قۇرمەتتى ازاماتى ەرمەك ەسەل ۇلى ءار كۇيدىڭ تاريحىن تارقاتا وتىرىپ، ورىنداپ بەردى. ونىڭ ايتۋىنشا، قۇرمانعازىنىڭ وزىمەن كۇي تارتىسقان ورىنشا قىزدىڭ ءبىر عانا شىعارماسى كەيىنگە جەتكەن.
تاريحتا توعىز «بايجۇما» بولسا، ورىنشانىڭ «بايجۇماسى» سونىڭ بىرىنە دە ۇقسامايدى. سول سەكىلدى ەرەن كۇيشىلىگىنە قوسا كۇش-قايراتىنىڭ مولدىعىمەن، جۇرەك جۇتقان باتىلدىعىمەن اتى شىققان سەيتەكتىڭ «ورىتپاسى» جورتۋىلدى ەسكە تۇسىرەدى.
ال داۋلەتكەرەيدىڭ تۇيەسىن باققان ءمۇسىرالىنىڭ كۇيشى ەكەندىگىن جۇرتشىلىق كوپكە دەيىن بىلمەگەن. ول كۇيدى مال باعىپ جۇرگەندە عانا تارتىپ، توسپالى دومبىراسىن قايتاردا دالاعا تىعىپ كەتەتىن بولعان. ونىڭ ايەلى ەرتە قايتىس بولىپ، ءتورت- بەس جاسار ۇلى ۇيدە جالعىز قالادى ەكەن. بىردە ورىستەن قايتىپ كەلە جاتقاندا، قارايعاندى كورىپ، قاسقىر ەكەن دەپ، بىلتەلى مىلتىعىمەن اتىپ سالادى.
سويتسە، ول ءوزىن قارسى العالى شىعىپ كەتكەن ۇلى ەكەن. ۇيىنە ەل جينالعان كەزدە داۋلەتكەرەيدەن دومبىرا سۇراپ الىپ تارتىپ، «قۋ جەتىم» دەگەن كۇيىن شىعارادى.
بۇل كۇي كەڭەستىك داۋىردە اتى وزگەرتىلىپ، ءمۇسىرالىنىڭ كۇيى «ءمۇسىرالى» دەپ تارتىلىپ ءجۇردى. مامەن كۇيشىنىڭ «قايعىلى قاراسى» دا وسىعان ۇقساس. ونىڭ كەلىن الىپ كەلەمىن دەپ كەتكەن ۇلى اتى ۇركىپ، سودان جىعىلىپ، قازا تابادى. مىنە، ەرمەك قازيەۆ «قۋ جەتىم» مەن «قايعىلى قارا» كۇيلەرىنىڭ نوتاعا تۇسكەندەگىدەن وزگە نۇسقاسىن كوپشىلىككە ۇسىندى.
قۇيماقۇلاق دومبىراشى وسى كۇيلەردىڭ بارلىعىن ءوز اكەسى ەسەل قازيەۆتەن الىپ قالعان. جۇزدەن استام كۇي بىلەتىن داۋلەسكەر دومبىراشى سونىڭ ىشىندە سيرەك ورىندالاتىندارىنىڭ دا تاريحىن ايتىپ، تارتىپ وتىرعان. قازاق راديوسىنىڭ التىن قورىنا 28 كۇي جازدىرعان ەسەل قازيەۆتىڭ جولىن ۇلى ەرمەك، كەيىن نەمەرەسى اسىلحان جالعاستىردى.
بۇل جولى ق ر مادەنيەت سالاسىنىڭ ۇزدىگى، رەسپۋبليكالىق دومبىراشىلار بايقاۋلارىنىڭ جەڭىمپازى اسىلحان قازيەۆ ءوز الدىنا، ساحناعا العاش رەت ەرمەك ەسەل ۇلىنىڭ جيەن نەمەرەسى ميراس قامي دا شىقتى.
ەرمەك قازيەۆتىڭ ورىنداۋشىلىق قولتاڭباسى بولەك ەكەندىگىن كەزىندە الماتى ساحناسىندا دومبىرا تارتقاندا، بىلگىر ماماندار اتاپ كورسەتكەن بولاتىن. ودان كۇي ۇيرەنۋشىلەر ءالى دە از ەمەس.
«ءبىز ەرمەك قازيەۆتى تالاي جىلدان بەرى بىلسەك تە، وسى جولى جاڭا قىرىنان تانىپ وتىرمىز. ارنايى مۋزىكالىق ءبىلىم الماسا دا، كونسەرۆاتوريادا وقىماعانمەن، ونىڭ نوتاعا تۇسە قويماعان، سيرەك ورىندالاتىن كۇيلەردى تارتۋى قۇرمانعازى، دينا، داۋلەتكەرەي، سەيتەك سىندى بابالارىمىزدان قالعان مۇرانىڭ مولدىعىن كورسەتەدى. بۇل ارنايى زەرتتەۋدى قاجەت ەتەدى. قازاق ۇلتتىق ونەر ۋنيۆەرسيتەتى بار، باسقا وقۋ ورىندارى بار، بۇل ىسكە مۋزىكا ماماندارى كەشىكپەي كىرىسۋى كەرەك. ەڭ باستىسى، ۇرپاقتان ۇرپاققا جالعاسىپ كەلە جاتقان كۇي ونەرى ولمەۋى ءتيىس»، دەدى قازاقستاننىڭ ەڭبەك سىڭىرگەن قايراتكەرى، كۇيشى-كومپوزيتور، استانا قالاسى مەملەكەتتىك فيلارمونياسى قازاق حالىق اسپاپتار وركەسترىنىڭ كوركەمدىك جەتەكشىسى ءارى باس ديريجەرى ايتقالي جايىموۆ.
ا. جايىموۆ باتىس قازاقستاندىق ديريجەر، قازاقستاننىڭ ەڭبەك سىڭىرگەن قايراتكەرى قىرىمگەرەي قاجىموۆپەن كەزەكتەسىپ، ع. قۇرمانعاليەۆ اتىنداعى ب ق و فيلارمونياسى داۋلەتكەرەي اتىنداعى قازاق ۇلت اسپاپتار وركەسترىنە ديريجەرلىك ەتسە، استانادان كەلگەن تاعى ءبىر قۇرمەتتى مەيمان-كۇيشى، قازاقستاننىڭ ەڭبەك سىڭىرگەن ءارتىسى، پروفەسسور، قازاق ۇلتتىق ونەر ۋنيۆەرسيتەتىنىڭ پرورەكتورى تۇرار الىپبايەۆ كۇي تارتىپ بەردى.
ەرمەك قازيەۆ ءوزىنىڭ جەتپىس جاسقا تولۋىنا وراي وبلىس اكىمى التاي كولگىنوۆتىڭ قابىلداپ، قۇرمەت كورسەتكەنىن، وندا ءوزىنىڭ ءبىر عانا بۇيىمتاي ايتقانىن جەتكىزدى.
ول - داۋلەتكەرەي اتىنداعى وركەستردىڭ اكادەميالىق اتاق الۋى ءۇشىن باسقا شارتتارمەن قاتار بىرنەشە شەت ەلگە شىعىپ، ونەر كورسەتۋى قاجەت. بۇل ۇسىنىس وبلىس باسشىلىعى تاراپىنان قولداۋ تاۋىپ، الداعى جىلدان باستاپ مۇنداي ساپارلار ۇيىمداستىرىلاتىن بولادى. دەمەك، ۇلى ونەر كوشى توقتاماق ەمەس.
