شىمكەنتتە ساداق اتۋدان حالىقارالىق تۋرنير باستالدى
الامان سايىسقا 6 مەملەكەتتىڭ مەرگەندەرى قاتىسۋدا، دەپ حابارلايدى قازاقپارات ءتىلشىسى.
وبلىس سپورتىنىڭ دامۋىنا ايىرىقشا ۇلەس قوسىپ، كوپ جىلدار جوعارى سپورت شەبەرلىگى مەكتەبىن باسقارعان شەرتاي امىربەك ۇلى ساداق سپورتىنا قازاق جاستارىنىڭ كوپتەپ تارتىلۋىنا دا ەڭبەك ءسىڭىردى. سونىڭ ناتيجەسىندە اينۇر ءابدىرايىموۆا سياقتى سايىپقىراندار وليمپيادا ويىندارىنا قاتىستى. بۇل تۋرالى جارىستىڭ اشىلۋ ءراسىمى كەزىندە وبلىستىق ساداق اتۋ فەدەراتسياسىنىڭ پرەزيدەنتى عاني تاشقارايەۆ ايتىپ ءوتتى.
حالىقارالىق دارەجەدەگى ءداستۇرلى تۋرنيرگە رەسەي، بەلارۋس، گرۋزيا، ارمەنيا جانە ورتا ازيا ەلدەرىنەن 170-تەن اسا مەرگەن قاتىسۋدا. جابىق الاڭداعى جامبى اتۋدا وبلىس نامىسىن بالعاباي ەلشيەۆ باسقاراتىن جوعارى سپورت شەبەرلىگى مەكتەبىنىڭ ساداق اتۋ شەبەرلەرى قورعايدى. ولاردىڭ قاتارىندا ريو وليمپياداسىنا قاتىسقان لۋيزا سايديەۆا سىندى ساڭلاقتار دا بار.
