قازاقستاننىڭ ۇزدىك جەڭىل اتلەتتەرى ماراپاتتالدى

اتالعان شارادا اشحابادتا وتكەن جابىق كەشەندەگى ازيا ويىندارىنىڭ جەڭىمپازدارى مەن جۇلدەگەرلەرى فەدەراتسيا پرەزيدەنتىنىڭ قولىنان العىس حاتپەن قارجىلاي سىياقى الدى.

ەستەرىڭىزدە بولسا، تۇرىكمەنستان استاناسىندا قازاقستان جەڭىل اتلەتتەرى جالپى سانى 10 مەدال جەڭىپ العان بولاتىن. ونىڭ ىشىندە 6 التىن، 1 كۇمىس، 3 قولا مەدال بار. ولگا رىپاكوۆا ءۇش قارعىپ جانە ۇزىندىققا سەكىرۋدەن توپ جارسا، ۆيكتوريا زيابكينا 60 مەترگە جۇگىرۋدىڭ ۇزدىگى اتانعان. سىرىقپەن سەكىرۋشى سەرگەي گريگوريەۆ پەن يادرو سەرپۋشى يۆان يۆانوۆ جانە 400 مەترگە جۇگىرۋشى ەلينا ميحينا دا چەمپيونداردىڭ قاتارىندا. سونداي-اق جۇلدەگەرلەر قاتارىندا ماريا وۆچيننيكوۆا (ءۇش قارعىپ سەكىرۋ)، ولگا سافرونوۆا (60 مەترگە جۇگىرۋ)، اناستاسيا ۆينوگرادوۆا (60 مەترگە توسقاۋىلدار ارقىلى جۇگىرۋ) بار.

بيىلعى جىلى لوندوندا وتكەن الەم چەمپيوناتىندا قولا جۇلدە ەنشىلەگەن، «گاۋھار ليگانىڭ» فينالدىق كەزەڭىنىڭ جەڭىمپازى اتانعان ولگا رىپاكوۆا «جىلدىڭ ۇزدىك جەڭىل اتلەتى» اتاندى.

«جەڭىل اتلەتيكا فەدەراتسياسىنىڭ سپورتشىلاردىڭ ەڭبەگىن باعالاپ، وسىنداي قۇرمەت كورسەتىپ جاتقانىنا العىس بىلدىرەمىن. شىنىن ايتۋ كەرەك، مۇنداي ماراپات العاش رەت بولىپ تۇر. سوندىقتان سپورتشىلار فەدەراتسيانىڭ قازىرگى باسشىلىعىنا العىسىن بىلدىرەدى»، - دەدى ولگا رىپاكوۆا.

ال «2017 -جىلعى ەڭ ۇزدىك جوبا» بولىپ، «ALTAY athletics»  كلۋبى تانىلدى. جۇلدە كلۋبتىڭ قۇرىلۋىنا ءوز ۇلەسىن قوسقان شىعىس قازاقستان وبلىسىنىڭ اكىمى دانيال احمەتوۆكە تابىستالدى.

«جىلدىڭ ۇزدىك ايماقتىق فەدەراتسياسى» نوميناتسياسىن قاراعاندى وبلىسى جەڭىپ الدى. سالتاناتتى شاراعا وبلىستىق فەدەراتسيانىڭ پرەزيدەنتى، قاراعاندى وبلىسى اكىمىنىڭ ورىنباسارى اسىلبەك دۇيسەبايەۆ قاتىستى.

ودان بولەك، ۇلتتىق وليمپيادا كوميتەتى 25 جىلدىق مەرەيتويىنا بايلانىستى دايىنداعان وليمپيادا ويىندارىندا اتوي سالعان جەڭىل اتلەتتەر ولگا شيشيگينا مەن دميتري كارپوۆقا ارنايى توسبەلگى تابىستالدى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى