كەلەسى جىلعا قانشا «بولاشاق» ستيپەندياسى تاعايىندالاتىنى بەلگىلى بولدى
جيىندى اشقان گۇلشارا ءابدىقالىقوۆا مەملەكەت باسشىسىنىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا: «تابىستى بولۋدىڭ ەڭ ىرگەلى، باستى فاكتورى ءبىلىم ەكەنىن اركىم تەرەڭ ءتۇسىنۋى كەرەك. جاستارىمىز باسىمدىق بەرەتىن مەجەلەردىڭ قاتارىندا ءبىلىم ءاردايىم ءبىرىنشى ورىندا تۇرۋى شارت» دەپ اتاپ وتىلگەنىن جەتكىزدى.
مەملەكەتتىك حاتشى ءبىلىمنىڭ جاھاندىق ەكونوميكاسىندا باسەكەگە تۇسە الاتىن ۇمىتكەرلەردى ساپالى ىرىكتەپ الۋ ءۇشىن ءتيىستى شارا قابىلداۋ قاجەتتىگىن اتاپ ءوتتى. بۇل رەتتە، ەلدىڭ الەۋمەتتىك-ەكونوميكالىق دامۋ باسىمدىقتارىن ەسكەرە وتىرىپ، مەريتوكراتيا قاعيداتىن ۇستانۋ قاجەت.
وتىرىس بارىسىندا ءبىلىم جانە عىلىم ءمينيسترى ە. ساعادييەۆتىڭ شەتەلدە كادرلار دايارلاۋ جونىندەگى رەسپۋبليكالىق كوميسسيانىڭ حاتتامالىق تاپسىرمالارىنىڭ ورىندالۋى تۋرالى ەسەبى تىڭدالدى، سونداي-اق «بولاشاق» ستيپەندياسىنىڭ ىسكە اسىرىلۋىنا قاتىستى ءبىرقاتار ماسەلە قاراستىرىلدى.
كوميسسيا شەشىمىمەن «بولاشاق» حالىقارالىق ستيپەندياسىن دامىتۋدىڭ 2018-2025-جىلدارعا ارنالعان جوسپارى ماقۇلداندى، 2018-جىلعى باسىم ماماندىقتار تىزبەسى بەكىتىلدى. جاڭارتىلعان تىزبە ەلىمىزدىڭ ءۇشىنشى جاڭعىرۋىنىڭ مىندەتتەرىن ىسكە اسىرۋعا باعىتتالعان 160 ماماندىقتان تۇرادى. 2018-جىلعا 555 ستيپەنديا ءبولۋ كوزدەلدى.
بيىل ستيپەنديا ماگيستراتۋرا مەن دوكتورانتۋرادا وقۋعا، سونداي-اق الەمنىڭ جەتەكشى عىلىمي جانە وندىرىستىك ورتالىقتارىندا تاعىلىمدامادان وتۋگە جىبەرىلەتىن 309 ۇمىتكەرگە تاعايىندالدى.
وتىرىس قورىتىندىسى بويىنشا مەملەكەتتىك حاتشى گۇلشارا ءابدىقالىقوۆا «بولاشاق» حالىقارالىق ستيپەندياسىن ودان ءارى ىسكە اسىرۋعا قاتىستى ءبىرقاتار تاپسىرما بەردى.
