قازاقستاندا جايىلىمدىق جەرلەردىڭ ەلەكتروندى گەوبوتانيكالىق كارتاسى جاسالادى

بۇل تۋرالى «نۇر وتان» پارتياسىنىڭ ورتالىق اپپاراتىنىڭ كەڭەسىندە «اگرارلىق سالا» باعىتى بويىنشا وتكەن كوميتەت وتىرىسىندا ق ر اۋىل شارۋاشىلىعى ۆيتسە-ءمينيسترى ەرلان نىسانبايەۆ ءمالىم ەتتى، دەپ حابارلايدى «قازاقپارات» ح ا ا ءتىلشىسى.

«جايىلىم جەرلەردىڭ ءشوپ شىعىمدىلىعى مەن جاي-كۇيىن انىقتاۋ ءۇشىن مينيسترلىك گەوبوتانيكالىق زەرتتەۋ جۇمىستارىن جۇرگىزۋدى قولعا الدى.

2017-2021-جىلدارعا ارنالعان اگروونەركاسىپ كەشەنىن دامىتۋ باعدارلاماسىنا سايكەس، قۇنى 3,3 ميلليارد تەڭگەگە 33 ميلليون گەكتارلىق جايىلىم جەرگە گەوبوتانيكالىق زەرتتەۋ جۇرگىزىلەدى.

ال ەلەكتروندى كارتالاردى جاساۋعا 265 ميلليون تەڭگە جۇمسالادى. بيىلعى جىلى 325 ميلليون تەڭگەگە 3,8 ميلليون گەكتارلىق اۋماققا زەرتتەۋ جۇمىستارى جۇرگىزىلدى. جۇمىستىڭ ناتيجەسى گەوبوتانيكالىق كارتالاردا ەلەكتروندى فورماتتا جاريالاناتىن بولادى»، - دەيدى ەرلان نىسانبايەۆ.

ۆيتسە-ءمينيستردىڭ ايتۋىنشا، كارتالاردا جەردىڭ ساپالىق مىنەزدەمەسى، جايىلىمداردىڭ ءشوپ شىعىمى، جەر ۋچاسكەلەرىنىڭ كاداسترلىق باعاسىن انىقتاۋعا مۇمكىندىك بەرەتىن القاپتاردىڭ ونىمدىلىگى كورسەتىلەتىن بولادى.

«اتالعان جۇمىستى بۇگىنگى تاڭدا «ازاماتتارعا ارنالعان ۇكىمەت» مەملەكەتتىك كورپوراتسياسى مەن ونىڭ وڭىرلەردەگى فيليالدارى اتقارىپ جاتىر»، - دەيدى ەرلان نىسانبايەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى