قىسقى وليمپياداعا باراتىن سپورتشىلارىمىز دوپينگتەن تازا - مۇسايبەكوۆ

بۇل تۋرالى بۇگىن ۇكىمەت ۇيىندە وتكەن باسپا ءسوز ءماسليحاتىندا ق ر مادەنيەت جانە سپورت ۆيتسە-ءمينيسترى ساكەن مۇسايبەكوۆ ايتتى، دەپ حابارلايدى قازاقپارات.

«1992-جىلى قازاقستان ءبىراۋىزدان، ەسكەرتپەسىز حالىقارالىق وليمپيادا كوميتەتىنىڭ حارتياسىنا قابىلداندى. اتالعان حارتياعا سايكەس وليمپيادا كوميتەتىنىڭ بارلىق ەرەجەلەرىن ورىنداپ كەلەمىز. سونىمەن قاتار 2009-جىلى انتيدوپينگتىك كونۆەنتسيا قابىلدانىپ، ەلىمىزدىڭ پارلامەنتى راتيفيكاتسيالادى. كونۆەنتسياعا سايكەس ءبىز دوپينگپەن كۇرەسۋگە ءتيىسپىز. جالپى، قازاقستان دوپينگكە قارسى مەملەكەت. ءبىزدىڭ باستى ماقساتىمىز - تازا سپورت. ءبىز تەك قانا تازا سپورتتى قولدايمىز. ءبىز تەك قانا تازا سپورت تۋرالى ويلايمىز»، - دەدى مۇسايبەكوۆ.

ونىڭ ايتۋىنشا، وسى ۋاقىتقا دەيىن قازاقستان سپورتشىلارى بىرنەشە مارتە دوپينگ سىناماسىن تاپسىرىپ، ول گەرمانيانىڭ درەزدەن قالاسىنداعى زەرتحانادا بىرنەشە رەت تەكسەرۋدەن وتكەن.

«وسى سىنامالاردىڭ ناتيجەسى جاقسى، سپورتشىلارمىز تازا. سوعان قاراماستان ۇلتتىق وليمپيادا كوميتەتىنىڭ پرەزيدەنتى مەن مادەنيەت جانە سپورت ءمينيسترىنىڭ تاپسىرماسىنا سايكەس جولداما العان سپورتشىلارمىز وليمپياداعا دەيىن تاعى دا دوپينگ سىنامالارىن تاپسىرادى. ءبىزدىڭ سپورتشىلارىمىزعا وليمپياداعا جول اشىق. ەشقانداي كەدەرگى جوق. وليمپياداعا تەك قانا تازا سپورتشىلار بارادى»، - دەدى ۆيتسە-مينيستر.

اۆتور: مارلان جيەمباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى