زۋلفيا گابيدۋللينا حالىقارالىق پاراليمپيادا كوميتەتىنىڭ ارنايى ماراپاتىن الدى

مەكسيكادا جۇزۋدەن مۇمكىندىگى شەكتەۋلى سپورتشىلار اراسىندا الەم چەمپيوناتى ءوتىپ جاتىر. وندا قازاقستان قۇراماسىنىڭ قورجىنى تاعى ءبىر ناگرادامەن تولىقتى.

«بەلگىلى سپورتشى، 2016 -جىلى وتكەن XV جازعى پاراليمپيادا ويىندارىنىڭ چەمپيونى زۋلفيا گابيدۋللينا 50 مەتر قاشىقتىققا ەركىن ستيلدە ءجۇزۋ بويىنشا ءبىرىنشى ورىندى جەڭىپ الدى. سونىمەن قاتار زۋلفياعا حالىقارالىق پاراليمپيادا كوميتەتىنەن 2017 -جىلعى بۇكىل الەمدىك جەڭىستەر سەرياسى ءۇشىن ارنايى ناگرادا تابىستالعانىن اتاپ ءوتۋ كەرەك. وسى سىيلىققا باسقا ەلدەردىڭ تاعى 4 جۇزگىشى قول جەتكىزدى. وتانداسىمىزدىڭ بۇل تىزىمنەن بوي كورسەتكەنى قۋانتادى»، - دەيدى قازاقستان ۇلتتىق پاراليمپيادالىق كوميتەتىنىڭ باسپا ءسوز قىزمەتىنەن.

بۇرىن قازاقستانعا كۇمىس پەن قولا مەدالدى ءانۋار احمەتوۆ پەن اندرەي افاناسەۆ الىپ بەرگەنى تۋرالى حابارلانعان بولاتىن.

ەسكە سالا كەتسەك، جۇزۋدەن پاراليمپيادالىق الەم چەمپيوناتى مەكسيكا استاناسىندا 2-7 -جەلتوقسان كۇندەرى ارالىعىندا ءوتىپ جاتىر.

ءدال قازىر قازاقستان قۇراماسىنىڭ قورجىنىندا ەكى التىن، ءۇش كۇمىس جانە ءبىر قولا مەدال بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى