شەتەلدىك تۋريستەر ءۇشىن پاكەتتىك ۇسىنىمداردى كوبەيتۋ قاجەت - ارىستانبەك مۇحامەدي ۇلى

وندا ق ر مادەنيەت جانە سپورت ۆيتسە-ءمينيسترى ەرلان قوجاعاپانوۆ ق ر مادەنيەت جانە سپورت ءمينيسترى ارىستانبەك مۇحامەدي ۇلى العى ءسوزىن وقىپ بەردى.

مينيستر ءوز سوزىندە قازاقستاننىڭ بيىلعى بۇكىلالەمدىك ەكونوميكالىق فورۋمنىڭ ءتۋريزمنىڭ باسەكەگە قابىلەتتىلىگى يندەكسى بويىنشا 133 مەملەكەت اراسىنان 81 ورىنعا يە بولعانىن اتاپ ءوتتى جانە تۋريزم سالاسىندا ەلەۋلى ەكونوميكالىق ناتيجەگە قول جەتكىزۋ ءۇشىن اتقارىلۋى ءتيىس جۇمىستارعا توقتالدى.

«تۋريزم سالاسى بويىنشا ەلەۋلى ەكونوميكالىق تابىسقا جەتۋ ءۇشىن بارىمىزگە ساپالى تۋريستىك ۇسىنىمدار بويىنشا ۇيلەستىرىلگەن ناقتى جۇمىستار جۇرگىزۋ قاجەت. جۇيەلى شارالاردان بولەك، رەسپۋبليكامىزدىڭ ءار ءوڭىرىنىڭ بىرەگەيلىگىن كورسەتە الاتىن پاكەتتىك تۋريستىك ۇسىنىمداردى دامىتۋعا نازار اۋدارۋ قاجەت. بۇل تۋريستىك ءوسىم نۇكتەلەرى اينالاسىندا ماتەريالدىق پەن قارجىلىق رەسۋرستى جانە ادامي كاپيتالدى شوعىرلاندىرۋعا، ىشكى جانە سىرتقى تۋريزم اعىنىن ۇلعايتۋعا مۇمكىندىك بەرەدى»، - دەلىنگەن ءمينيستردىڭ العى سوزىندە.

سونداي-اق، مينيستر ەكو جانە ەتنوتۋريزمدى قازاقستاندىق تۋريستىك ءونىمنىڭ نەگىزىنە اينالدىرۋ قاجەتتىگىن باسا ايتقان.

«ەكوتۋريزم مەن ەتنوتۋريزم بىرەگەي تابيعاتى مەن ءتول مادەنيەتى بار قازاقستاننىڭ تۋريستىك ءونىمىنىڭ نەگىزىنە اينالۋى ءتيىس. ول ءۇشىن قولونەر كاسىبىن دامىتىپ، كادەسىي ونىمدەرىن ءوندىرۋدى قولعا الۋ كەرەك. اۋىلدىق جەرلەر مەن تابيعي زونالاردا قوناق ۇيلەر مەن دەمالىس بازالارىن سالۋ قاجەت. سونداي- اق، جىل سايىن «ۇلى دالا رۋحى» ەتنيكالىق فەستيۆالى، الما فەستيۆالى، قىزعالداق جولى، ۇلى جىبەك جولى، التاي - مادەنيەت بەسىگى، تايقازان ت. ب. سەكىلدى فەستيۆالدەر مەن ەتنيكالىق كومپونەنتى بار وزگە دە تۋرلاردى وتكىزىپ تۇرعان ءجون»، - دەيدى مينيستر.

وسى ورايدا، مينيستر وتاندىق تۋريستىك ءونىمدى حالىقارالىق جانە ىشكى نارىقتا ناسيحاتتاۋ، ەلىمىزدىڭ تۋريستىك ءيميدجىن قالىپتاستىرۋ، ۇلتتىق تۋريستىك برەندتى كاسىبي باسقارۋ سىندى وزگە دە مىندەتتەرمەن بيىلعى شىلدە ايىندا ارنايى قۇرىلعان «Kazakh Tourism» ۇلتتىق كومپانياسى» اق اينالىساتىنىن حابارلادى.

«Kazakh Tourism» كومپانياسى ەلىمىزدىڭ تۋريزم سالاسىنا ينۆەستيتسيا تارتۋمەن دە اينالىساتىن بولادى. ونداعى شتاتتىق كۇن ءتارتىبى بەكىتىلىپ، كاسىبي كوماندا جينالدى جانە كومپانيا ءوزىنىڭ قىزمەتتىك مىندەتتەرىن اتقارۋعا كىرىسىپ كەتتى»، - دەلىنگەن ا. مۇحامەدي ۇلى العى سوزىندە.

سونداي-اق ءمينيستردىڭ پىكىرىنشە، جوعارىدا اتالعان شارالاردىڭ ىسكە اسىرىلۋى ەل ەكونوميكاسىندا تۋريزم ۇلەسىن ارتتىرۋعا، جاڭا جۇمىس ورىندارىنىڭ اشىلۋىنا جانە تۋريزم سالاسىنا قاجەتتى ينۆەستيتسيالاردى تارتۋعا مۇمكىندىك بەرەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى