قۇقىق قورعاۋ ورگاندارىنىڭ جاۋاپكەرشىلىگى ارتادى - باس پروكۋرور
بۇگىن پارلامەنت سەناتىنىڭ جالپى وتىرىسىندا ق ر باس پروكۋرورى جاقىپ اسانوۆ وسىلاي ءمالىم ەتتى، دەپ حابارلايدى قازاقپارات.
«بۇل زاڭ جوباسى قۇقىق قورعاۋ ورگاندارىن كۇشەيتپەيدى، بىزگە ەشقانداي جاڭا وكىلەتتىك بەرىلمەيدى. ونىڭ ماقساتى ءبىزدىڭ موينىمىزعا جاڭا مىندەتتەردى جۇكتەۋگە، جاۋاپكەرشىلىكتى ارتتىرۋعا نەگىزدەلگەن. ءقازىر سانكتسياسىز كۇدىكتىنى 72 ساعاتقا دەيىن قۇقىق قورعاۋ ورگاندارى ۇستاۋعا قۇقىلى. ال وسىنى 48 ساعاتقا دەيىن قىسقارتۋدى ۇسىنىپ وتىرمىز. ەگەر كۇدىكتى 18 جاسقا تولماسا، وندا ءتىپتى 24 ساعاتقا دەيىن. بۇل شارالار باسىم كوپشىلىك قىلمىستار ءۇشىن ەسكەرىلگەن»، - دەپ توقتالدى باس پروكۋرور قۇقىق قورعاۋ قىزمەتىنىڭ پروتسەستىك نەگىزدەرىن جاڭعىرتۋعا باعىتتالعان زاڭ جوباسى بويىنشا بايانداماسىندا.
ونىڭ پايىمىنشا، بۇل باعىتتا تەرگەۋ بويىنشا قۇقىق قورعاۋ ورگاندارى جۇمىستارى جىلدامدايدى دەپ كۇتىلۋدە.
بىرىنشىدەن، وسى 48 ساعاتتىڭ ىشىندە تەرگەۋشى بارلىق دالەلدى جيناپ، پروكۋرورعا بارىپ، ءتۇسىندىرۋى ءتيىس. پروكۋروردىڭ كوزى جەتسە، سوتقا جۇگىنىپ، سوتتىڭ شەشىمى شىعادى. وسىنىڭ بارلىعى 48 ساعاتتىڭ ىشىندە بولۋى كەرەك. ال ۇلگەرمەسە، ۋاقىتشا ۇستاۋ وقشاۋلاعىشتىڭ باسشىسى ادامدى بوساتۋى ءتيىس. ەگەر شىعارماسا، ءوزى جاۋاپكەرشىلىككە تارتىلاتىن بولادى. جالپى، 48 ساعاتتىق مەرزىم حالىقارالىق ستاندارتقا ساي كەلەدى.
«ەكونوميكالىق قىلمىس تەرگەلىپ جاتسا، تەرگەۋ كەزىندە ەشكىمدى قاماماۋدى ۇسىنامىز. بۇل ەندى بيزنەس جاساپ جۇرگەن ادامدار قوعامعا، جەكە ادامعا ونشا قاۋىپتى ەمەس. ولار قايتا بوس جۇرسە، ءوزىنىڭ بيزنەسىن جالعاستىرىپ، ادامدارعا جۇمىس ورىندارىن ساقتاپ قالادى. ءبىراق كەيبىر قىلمىستاردى بيزنەس دەپ ايتۋ قيىن، ياعني جالعان اقشا جاساۋ، قارجىلىق پيراميدا نەمەسە ۇيىمداسقان قىلمىستىق توپتارعا قاتىسسا، ولاردى شەكتەپ، قاماۋعا العان ءجون»، - دەپ اتاپ ءوتتى ج. اسانوۆ.
ەستەرىڭىزگە سالا كەتەيىك، بيىل قازان ايىندا مەملەكەت باسشىسى كونستيتۋتسيانىڭ 61-بابىنىڭ 1-تارماعىنا سايكەس پارلامەنت ءماجىلىسىنىڭ قاراۋىنا «قازاقستان رەسرۋبليكاسىنىڭ كەيبىر زاڭنامالىق اكتىلەرىنە قۇقىق قورعاۋ قىزمەتىنىڭ پروتسەستىك نەگىزدەرىن جاڭعىرتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ەنگىزدى.
