قاراعاندى وبلىسىندا «وڭالتۋ تۇرمەسى» اتتى سىناق جوباسى جۇزەگە اسىرىلۋدا
ول باس بوستاندىعىنان ايىرىلعانداردى قوعامعا قايتا بەيىمدەۋ باعىتىندا مەملەكەتتىك ورگاندار مەن ۇكىمەتتىك ەمەس سەكتوردىڭ جۇمىسىن بىرىكتەرەدى، دەپ حابارلايدى قازاقپارات قاراعاندى وبلىسى اكىمدىگىنە سىلتەمە جاساپ.
جوبانى باستاۋ جانە جۇزەگە اسىرۋ ماسەلەلەرى قاراعاندى وبلىسى اكىمدىگىنىڭ جانىنداعى كونسۋلتاتيۆتىك- كەڭەستىك ورگاننىڭ وتىرىسىندا تالقىلاندى.
قاراعاندى وبلىسىنىڭ اكىمدىگى تاراتقان مالىمەتتەرگە قاراعاندا، قازاقستاندا ۇلت جوسپارىن جۇزەگە اسىرۋ شەڭبەرىندە 2017-2019 -جىلدارعى پروباتسيا قىزمەتىندە ەسەپتە تۇرعان جانە جازاسىن وتەپ شىققان ازاماتتاردى الەۋمەتتىك وڭالتۋ كەشەندىك ستراتەگياسى بەكىتىلگەن.
«سوتتالعانداردى قايتا بەيىمدەۋ - وزەكتى مىندەتتەردىڭ ءبىرى. ونى شەشۋ تەك قۇقىق قورعاۋ ورگاندرىنا عانا ەمەس، ءبىرىنشى كەزەكتە جەرگىلىكتى اتقارۋشى جانە باسقا دا ورتالىق مەملەكەتتىك ورگاندارعا، سونىمەن قاتار ازاماتتىق قوعام ينستيتۋتتارىنا دا تاۋەلدى»، - دەيدى ق ر ءى ءى م قىلمىستىق- اتقارۋ جۇيەسى كوميتەتى ءتوراعاسىنىڭ ورىنباسارى مەيرام ايۋبايەۆ.
ونىڭ ايتۋىشا، باس بوستاندىعىنان ايىرىلعانداردى الەۋمەتتىك بەيىمدەۋدە دامىعان ەلدەردىڭ تاجىريبەسى قولدانىلادى. بوستاندىققا شىققان سوڭ باسپانا، جۇمىسقا ورنالاستىرۋ، تۋعان- تۋىستارمەن بايلانىستى قايتا جانداندىرۋ سياقتى ماسەلەلەر بويىنشا العاشقى كومەك كورسەتۋ وتە ماڭىزدى:
«حالىقارالىق تاجىريبەنى ەسكەرە كەلە «وڭالتۋ تۇرمەسى» پيلوتتىق جوباسى جۇزەگە اسىرىلادى. ول بوستاندىققا شىعاتىن ازاماتقا ەڭبەك، تۇرمىستىق جانە باسقا دا ماسەلەلەر بويىنشا كەشەندى كومەك كورسەتۋدى قاراستىرادى. ول ءۇشىن ىشكى ىستەر ءمينيسترىنىڭ جارلىعىمەن ۆەدومستۆوارالىق جۇمىس توبى قۇرىلعان»، - دەپ مالىمدەدى مەيرام ايۋبايەۆ.
جوباعا ەۋروپالىق وداق قولداۋ كورسەتەدى. جوبانى جۇزەگە اسىرۋ ءۇشىن حالىقارالىق ساراپشى شاقىرتىلدى.
ىلكى جوبا رەتىندە قاراعاندى وبلىسىنىڭ ەكى مەكەمەسى تاڭدالعان: قاراباستاعى اك-159/18 جانە دولينكاداعى اك-159/20.
«قاراعاندى وبلىسىنىڭ تاڭداپ الىنۋى بەكەر ەمەس. وعان قىلمىستىق اتقارۋ جۇيەسى دەپارتامەنتىنىڭ، جەرگىلىكتى اتقارۋ ورگاندارىنىڭ، سونداي-اق ۇكىمەتتىك ەمەس سەكتوردىڭ بىرلەسە اتقارعان ناتيجەلى جۇمىسى تۇرتكى بولدى. وبلىس اكىمىمەن كەشەندىك ستراتەگيانى جۇزەگە اسىرۋ بويىنشا شارالار جوسپارىن اتقارۋ بويىنشا جەلىلىك كەستە قۇرىلدى»، - دەپ اتاپ ءوتتى ق ا ج ك ءتوراعاسىنىڭ ورىنباسارى.
2018- جىلدىڭ ساۋىرىنە دەيىن جوبا قاراعاندى وبلىسىندا اپروباتسيادان وتەدى دەپ جوسپارلانىپ وتىر. سونان سوڭ تاجىريبە رەسپۋبليكاعا تارالادى. قىلمىستىق اتقارۋ جۇيەسى تاراتقان مالىمەتتەر بويىنشا 2017- جىلدىڭ 10 ايىندا تۇزەۋ مەكەمەلەرىنەن 614 ادام بوستاندىققا شىققان، ولار وبلىسىمىزدىڭ ءتۇرلى قالالارى مەن اۋداندارىنا كوشىپ كەتكەن.
«2017- جىلدىڭ 1- قاراشاسىنا دەيىن تەمىر توردىڭ ارعى جاعىنان شىققان جانە پروباتسيا قىزمەتىندە جۇمىسقا تۇرۋ ءۇشىن ەسەپتە تۇرعاندار سانى 530 ادامدى قۇراعان، ولاردىڭ 276 ى جۇمىسقا ورنالاستىرىلدى، ونىڭ ىشىندە 49 الەۋمەتتىك، 51 قوعامدىق جۇمىستارعا. 52 ادام قىسقا مەرزىمدى كۋرستارعا جىبەرىلگەن»، - دەپ مالىمدەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى جەتەكشىسىنىڭ مىندەتىن اتقارۋشى ماكسيم گاليۋللين.
قازىرگى تاڭدا وسى ساناتتاعى ازاماتتارعا 2018- جىلعا ارنالعان جۇمىس ورىندارىنىڭ كۆوتالارى قۇرىلۋدا.
قاراعاندى وبلىسىندا تاعدىر تالكەگىنە تۇسكەن ازاماتتارعا ارنالعان ءۇش وڭالتۋ ورتالىقتارى قىزمەت ەتەدى - قاراعاندىدا، تەمىرتاۋدا جانە جەزقازعاندا. باسقارما اقپاراتىنا سۇيەنەر بولساق، بيىلعى جىلى وندا قاماۋدان شىققان 69 ادام پانا تاپقان.
