شىمكەنتتە «تۇركىستان- تۇركى الەمىنىڭ مادەني استاناسى» شاراسىنىڭ گالا كونسەرتى ءوتتى - فوتو
سالتاناتتى شارا «ءتۇبى ءبىر تۇركىلەر» حورەوگرافيالىق- پلاستيكالىق كومپوزيتسياسىمەن باستالدى، دەپ حابارلايدى قازاقپارات ءتىلشىسى.
تۇركى ەلدەرىنىڭ ونەرلى جاستارىنىڭ باسىن قوسقان جيىنعا «تۇركسوي» حالىقارالىق ۇيىمى حاتشىسىنىڭ ورىنباسارى فيرات پۋرتاش قاتىسىپ، تۇركىستاندا مادەني جىلدىڭ ءوز دەڭگەيىندە وتكەنىن ايتتى. سونىمەن قاتار، جىل كولەمىندە ەڭبەك سىڭىرگەن مادەنيەت جانە ونەر ۇجىمدارىنىڭ باسشىلارى مەن بۇقارالىق اقپارات قۇرالدارى وكىلدەرىنە تۇركسوي ۇيىمىنىڭ باس حاتشىسى دۇيسەن قۇسەيىنوۆتىڭ ارنايى العىس حاتى مەن سىي- سياپاتىن تابىس ەتتى.
ماراپاتتالعان تىلشىلەردىڭ اراسىندا «قازاقپارات» حالىقارالىق اقپارات اگەنتتىگىنىڭ مەنشىكتى ءتىلشىسى اينۇر اقبايەۆا دا بار. مەرەكەلىك شارادا سونداي-اق ازەربايجان، تۇرىكمەنستان، تۇركيا، وزبەكستان، قىرعىزستان مەملەكەتتەرى مەن رەسەي فەدەراتسياسىنىڭ تاتارستان، باشقۇرتستان، ساحا-ياكۋتيا، تىۆا رەسپۋبليكالارى جانە قىرىمنان ارنايى كەلگەن ونەر ۇجىمدارى ءوز ونەرلەرىن كورسەتتى. شارا سوڭى وبلىستىق فيلارمونيا مەن وپەرا جانە بالەت تەاترىنىڭ انشىلەرى جانە بارلىق قاتىسۋشىلار ورىنداعان «تۇركىستان - تۇركى الەمىنىڭ استاناسى» اتتى انمەن اياقتالدى.
ايتا كەتەيىك، كۇنى كەشە تۇركىستان قالاسىندا 35- تۇركسوي تۇراقتى كەڭەسىنىڭ كەزەكتى وتىرىسى ءوتىپ، ونىڭ شەشىمىمەن 2018 -جىلعى تۇركى الەمىنىڭ مادەني استاناسى - تۇركيا رەسپۋبليكاسىنىڭ كاستامونۋ قالاسى بولىپ بەكىتىلدى. سالتاناتى جابىلۋ شاراسى بارىسىندا «تۇركى الەمىنىڭ مادەني استاناسى» سيمۆولى مەن تۋى تۇركيالىق قوناقتارعا تاپسىرىلدى.
