ميدان باسقاسىنىڭ ءبارىن قولدان جاسايتىن شىعارمىز - يۋري پيا

سول كەزدە دونور ماسەلەسى دە شەشىلەدى. دارىگەر وسى ويىن بۇگىن جاساندى جۇرەك يمپلانتاتسياسىنا ارنالعان باسپا ءسوز ءماسليحاتىندا ايتتى، دەپ حابارلايدى قازاقپارات ءتىلشىسى.

«ماسەلەن، قازىرگى جاساندى جۇرەك اپپاراتتارىندا بيوتەحنولوگيالار قولدانىلادى. ىشىندەگى سورعى قاندى اينالدىرىپ، بيولوگيالىق مەمبرانانى ىسكە قوسادى. جاڭاعى مەمبرانا كادىمگىدەي ادام اعزاسى سياقتى، قاننىڭ قۇرامىنا دا اسەر ەتپەيدى. قان سول كۇيىندە قالادى. بۇل - ۇلكەن جەتىستىك. سەبەبى مەمبرانانىڭ ىشىندە تاعى قوسىمشا داتچيكتەر ورناتىلعان. ول داتچيكتەر ادامنىڭ دەنە بەلسەندىلىگىن عانا ەمەس، ەموتسيالىق جاي- كۇيىن انىقتاپ، جۇرەك قاعىسىن رەتتەپ وتىرادى. ادام قوبالجىسا، جاساندى جۇرەك قاتتى سوعادى. مەنىڭشە، الداعى ۋاقىتتا ميدان باسقاسىنىڭ ءبارى قولدان جاسالادى»، - دەيدى پيا.

ءوز سوزىندە ورتالىق باسشىسى ەلىمىزدەگى زاڭنامانىڭ، اتاپ ايتقاندا، وزىق تەحنولوگيالاردى ەنگىزۋگە ارنالعان نورمالاردىڭ وتاندىق مەديتسينا ءۇشىن ىڭعايلى ءارى پايدالى بولىپ جاتقانىن جەتكىزدى.

 «قازىرگى كەزدە جاساندى جۇرەك يمپلانتاتسياسى سالاسىندا باسەكە قىزىپ تۇر. اۋستريا، نيدەرلاندى، چەحيا، گەرمانيا - ءبارى- ءبارى ونداي وتالاردى وزدەرىندە جاساۋعا تىرىسادى. ءبىز دە قالىسپاي كەلەمىز. وسى ورايدا مەملەكەتىمىزدىڭ وزىق تەحنولوگيالاردى ەنگىزۋگە دەگەن ىنتاسىن، سوعان قاراي زاڭنامانى دا بەيىمدەۋگە دەگەن قۇلشىنىسىن ەرەكشە اتاپ وتكەن ءجون. سونىڭ ارقاسىندا ءبىز ءبىرىنشى بولىپ رۇقسات الىپ، جاساندى جۇرەك يمپلانتاتسياسى بويىنشا حالىقارالىق زەرتتەۋگە قاتىسىپ وتىرمىز»، - دەپ اتاپ كورسەتتى يۋريي پيا.

 ايتا كەتەيىك، بۇگىن ۇلتتىق كارديوحيرۋرگيا ورتالىعى ەلىمىزدە العاش رەت ادامعا جاساندى جۇرەك يمپلانتاتسياسىنىڭ جاسالعانىن جاريالادى. باسپاءسوز ءماسليحاتى كەزىندە جۋرناليستەر 60 جاستاعى پاتسيەنت قۇنانباي ابىرايەۆپەن دە كەزدەستى.

اۆتور: ارمان اسقاروۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى