قارلاگتا تۇتقىندا بولعان احيكو تۋرالى سپەكتاكل جاپونيادا قويىلادى
«اقتاستان شىققان احيكو» قويىلىمىنىڭ پرەمەراسى 21-25 - جەلتوقسان ارالىعىندا توكيودا وتەدى.
جاپون تىلىندەگى افيشالار توكيو كوشەلەرىنە ىلىنە باستادى.
قويىلىمنىڭ ءوزى قازاق تىلىندە، جاپون تىلىندە سينحروندى اۋدارما بولادى.
«قارلاگ تۇتقىنى احيكونىڭ ءومىرى ارقىلى بارلىق جاپوندىق تۇتقىنداردىڭ قازاقستانداعى ءومىرىن كورسەتكىمىز كەلەدى. لاگەردەن بوساپ شىققان كۇنى احيكونىڭ سالماعى بار- جوعى 24 كەلى بولعان. تاعدىردىڭ مۇنداي تالكەگىنەن 750 مىڭ ادام وتكەن. بۇل قويىلىمدى قازاقستاننىڭ قالالارىندا بىلتىر قويعانبىز. انشلاگ بولدى. جاپون ەلشىلىگى بۇل سپەكتاكلدى جاپونيادا، تەتسۋرونىڭ وتانىندا قويۋعا ۇسىنىس ءبىلدىردى»، - دەدى تەاتر ديرەكتورى ەرلان ءبىلال.
احيكو تەتسۋرو كەڭەس وداعى كەزىندە ستالين رەپرەسسياسىنىڭ قۇربانىنا اينالعان. نەبارى 17 جاسىندا قارلاگ تۇتقىنى بولدى. سپاسسك لاگەرىندە 6 جىلىن وتكىزدى. لاگەردەن بوساپ شىققان سوڭ ول قاراعاندىنىڭ اقتاس دەگەن جەرىندە تۇراقتاپ قالادى.
كەيىن شاحتاعا ورنالاسادى، زاۋىتتا دانەكەرلەۋشى بوپ جۇمىس جاسايدى. تەتسۋرو ۋكراين قىزى ەلەناعا ۇيلەنىپ، ودان 4 بالا سۇيگەن. 1989 -جىلى احيكو تەتسۋرو تولىعىمەن اقتالدى.
جارتى عاسىرعا سوزىلعان ومىردەن سوڭ عانا كۇنشىعىس ەلىنە بارىپ تۋعاندارىمەن كورىسكەن. جاپونيا ۇكىمەتى وعان پاتەر سىيلاعان. الايدا، وندا 3 جىل تۇرعان سوڭ احيكو قاريا قازاقستانداعى اۋىلىنا قايتىپ كەلگەن.
رەجيسسەر اسحات ماەمەروۆ قويىلىمدى دراماتۋرگ ءمادينا وماروۆانىڭ پەساسى جەلىسىمەن ساحنالادى.
«قاريانىڭ وزىمەن تىلدەسۋگە اۋىلىنا باردىم. ءوزىنىڭ جارى ەلەنا يۆانوۆنا ەكەۋى قارسى الدى. ەلەنا اپاي دا قازاقستانعا دەپورتاتسيالانعان ۋكراين قىزى ەكەن. احيكو اتا قاراپايىم بولسا دا قيىندىققا مويىمايتىن ادام ەكەنىن كورسەتتى. پەسا جازۋ وڭاي بولمادى، سەبەبى بۇل كىسىنىڭ ارتىندا مىڭداعان تاعدىر تۇر. ولاردىڭ كوپشىلىگى اقتالماي ءوتتى ومىردەن»، - دەدى پەسا اۆتورى ءمادينا وماروۆا.
قازىر احيكو قارتتىڭ جاسى 87-دە، 11 نەمەرە، 5 شوبەرە ءسۇيىپ وتىر.
قاريا قاراعاندىدا وتكەن پرمەراعا قاتىسىپ، ءوزىنىڭ ىستىق ىقىلاسىن بىلدىرگەن بولاتىن.
سونىمەن قاتار، توكيودا مۇحتار اۋەزوۆ اتىنداعى اكادەميالىق دراما تەاترى «ۇلى دالا حالقى» كونسەرتىن ۇسىنىپ، ۇلتتىق بۇيىمدار ورمەسىن وتكىزەدى.
