ەلباسى: شەتەلدەگى قاراجاتتى قايتارىڭدار دا، قازاقستاندا ۇستاڭدار
اتالعان مىندەت ۇكىمەت باسشىسى باقىتجان ساعىنتايەۆقا جۇكتەلدى، دەپ حابارلايدى قازاقپارات ءتىلشىسى.
«وسى ۋاقىتقا دەيىن ءبىز اقشانى زاڭداستىرۋدى ءۇش رەت وتكىزدىك. ەشكىمگە تيىسپەيمىز دەدىك. سولاي بولدى. ءبىر ادامدى جاۋاپقا تارتتىق پا؟ بىرەۋدىڭ استىن قازبالادىق پا؟ جوق، ەشكىمگە تيىسكەن جوقپىز. قازىرگى جاعدايدا سىزدەر شەكارانىڭ ارعى جاعىندا ۇستاپ وتىرعان اقشالارىڭىزدان ايىرىلاسىزدار! وزدەرىڭىز سەزىپ جاتقان بولارسىز. سانكتسيالىق سوعىس قىزىپ تۇر. وندايدا سىزدەرگە ەشكىم كومەكتەسە المايدى. اقشانى قازاقستانعا قايتارىڭدار دا، وسىندا ۇستاڭدار! قانداي كەپىلدىك كەرەك؟ مەن ءتيىستى زاڭداردى دا، جارلىقتاردى دا شىعارىپ بەرەمىن. ولاي ىستەمەيمىن دەسەڭدەر، ءبىز ءوزىمىز ىستەيمىز. ارتىنان رەنىش بولماسىن»، - دەدى نۇرسۇلتان نازاربايەۆ بۇگىن يندۋستريالاندىرۋ كۇنىنە ارنالعان جالپى ۇلتتىق تەلەكوپىر كەزىندە.
پرەزيدەنتتىڭ ايتۋىنشا، بۇگىندە 18 وتاندىق كومپانيا 12,5 ميلليارد دوللاردى شەتەلدە ۇستاپ وتىر.
اتاپ ايتقاندا، «تەڭىز شيەۆرويل» كومپانياسى - 4,5 ميلليارد دوللار، «قاز مۇناي گاز» ۇلتتىق كومپانياسى - 3 ميلليارد دوللار، «قاز مۇناي گاز بارلاۋ مەن ءوندىرۋ» كومپانياسى - 2 ميلليارد دوللار، «ازيا گاز قۇبىرى» ج ش س - 1 ميللياردتان استام، «بەينەۋ-شىمكەنت» گاز قۇبىرى» ج ش س - 100 ميلليون دوللار، بۇدان بولەك، «شىعىس تسەمەنت»، «جايىق مۇناي»، كاسپي قۇبىرى كونسورتسيۋمى جانە تاعى باسقا كومپانيالار شەتەلدە قىرۋار قاراجاتتى ۇستاپ كەلەدى.
«نەگە ولاي ىستەيسىزدەر؟ قازاقستاننىڭ رەسۋرستارىن ساتىپ، اقشا تاباسىزدار؟ ال تابىستى شەتەلدە ۇستايسىزدار. نەگە ول اقشا وسىندا اينالىپ، ەل ەكونوميكاسىنا جۇمىس ىستەمەيدى؟ جارتى جىلدىڭ ىشىندە مەملەكەتكە قاراستى كومپانيالار شەتەلدەگى قارجىسىن 2 ميلليارد دوللاردان 6 ميللياردقا دەيىن ۇلعايتتى. سىزدەر نەنى كۇتىپ وتىرسىزدار؟! مەن وسىنى تۇسىنبەيمىن»، - دەپ اتاپ كورسەتتى پرەزيدەنت.
وسى ورايدا مەملەكەت باسشىسى ءاربىر كومپانيا باسشىسىمەن جەكە-جەكە سويلەسۋدى تاپسىردى.
اتالعان مىندەت ۇكىمەت باسشىسى باقىتجان ساعىنتايەۆقا جۇكتەلدى.
«اقشانى قايتارماسا، مەن ولارمەن باسقاشا سويلەسەمىن. وسىنى بۇكىل قازاقستاننىڭ الدىندا ەسكەرتىپ قويايىن. ءبىز ول اقشانى قايتارۋدىڭ جولىن تابامىز. ءبىراق ول كەزدە سىزدەر بولمايسىزدار. سىزدەرگە جامان ءبىر نارسە ىستەيمىز دەپ وتىرعان جوقپىن. مەملەكەت سىزدەرگە اقشا جاساۋعا جاعداي جاسادى. سىزدەر بولساڭىزدار، ول اقشانى مەملەكەتتەن تىعىپ وتىرسىزدار. ولاي بولمايدى. جەتەدى وسىمەن»، - دەدى نۇرسۇلتان ءابىش ۇلى.
