بارلىق ەلدەرمەن شەكارانى شەگەندەۋ جۇمىسىنىڭ ماڭىزى زور - نىعماتۋلين
«قازاقستان-تۇركىمەن مەملەكەتتىك شەكاراسىن شەگەندەۋ 2001-جىلى 5- شىلدەدەگى قازاقستان رەسپەبليكاسى مەن تۇركىمەنستان اراسىنداعى قازاقستان - تۇركىمەن مەملەكەتتىك شەكاراسىن دەلەمەنتاتسيالاۋ جانە ونى دەموركاتسيالاۋ پروتسەسى تۋرالى شارتقا سايكەس جۇرگىزىلدى. بۇل شارت ق ر 2003-جىلعى 2- شىلدەدەگى زاڭمەن راتيفيكاتسيالانىپ، 2006-جىلعى 31- تامىزدا كۇشىنە ەندى. ق ر مەن تۇركىمەنستان اراسىنداعى قازاقستان-تۇركىمەن مەملەكەتتىك شەكاراسىن شەگەندەۋ تۋرالى كەلىسىمگە 2017-جىلعى 18- ساۋىردە استانا قالاسىندا تۇركىمەنستان باسشىسىنىڭ قازاقستانعا رەسمي ساپارى اياسىندا قر پرەزيدەنتى نۇرسۇلتان نازاربايەۆ پەن تۇركىمەنستان باسشىسى گۋربانگۋلى بەردىمۋحامەدوۆ قول قويدى. كەلىسىمنىڭ باستى ماقساتى - قازاقستان مەن تۇركىمەنستان اراسىنداعى شەگەندەلگەن مەملەكەتتىك شەكارا سىزىعىن حالىقارالىق قۇقىقتىق نەگىزدە بەكىتۋ بولىپ تابىلادى»، - دەيدى زاڭ جوباسىن پارلامەنتتە تانىستىرعان ق ر سىرتقى ىستەر ءمينيسترىنىڭ ورىنباسارى عالىمجان قويشىبايەۆ.
ونىڭ ايتۋىنشا، شەكارانى شەگەندەۋ ناتيجەسىندە مەملەكەتتىك شەكارا سىزىعىنىڭ ۇزىندىعى 458,3 شاقىرىمدى قۇراعان. مەملەكەتتىك شەكارا سىزىعىندا 330 شەكارالىق بەلگى ورناتىلعان. سونداي-اق، ۆيتسە-مينيستر مەملەكەتتىك شەكارا جانە شەكارالىق بەلگىلەردىڭ ورنالاسقان جەرىن اتاپ ءوتتى.
«كەلىسىم كۇشىنە ەنگەننەن كەيىن مەملەكەتتىك شەكارا سىزىعىن ساقتاۋ ماقساتىندا 10 جىلدا ءبىر رەت بىرلەسىپ تەكسەرۋ كوزدەلگەن. كەلىسىم بويىنشا جەرگىلىكتى جەردەگى كەز كەلگەن وزگەرىستەر مەملەكەتتىك شەكارا سىزىعىنىڭ وتۋىندەگى وزگەرىستەرگە الىپ كەلمەيدى. كەلىسىمنىڭ ەرەجەلەرىنە سايكەس، ول راتيفيكاتسيالاۋعا جاتادى جانە ديپلوماتيالىق ارنالار ارقىلى ونىڭ اياقتالعانى تۋرالى سوڭعى جازباشا حابارلاما تۇسكەن كۇننەن باستاپ كۇشىنە ەنەدى. كەلىسىمدى راتيفيكاتسيالاۋ مەن ونىڭ كۇشىنە ەنۋى مەملەكەتتىك اۋماقتى جانە ۇلتتىق ەگەمەندىكتىڭ كەڭىستىگى شەكتەرىن ايقىنداۋعا، اۋماقتىق داۋلاردى بولدىرماۋعا مۇمكىندىك بەرەدى»، - دەيدى ول.
كەلىسىمدى وسى جىلدىڭ 30-مامىرىندا تۇركىمەنستاننىڭ مەدجيليسى راتيفيكاتسيالاعانى تۋرالى تۇركىمەنستاننىڭ سىرتقى ىستەر مينيسترلىگىنىڭ نوتاسى كەلىپ تۇسكەن. ءوز كەزەگىندە ق ر پارلامەنت ءماجىلىسىنىڭ ءتوراعاسى نۇرلان نىعماتۋلين ەل تاۋەلسىزدىگىنىڭ ەڭ باستى جەتىستىكتەرىنىڭ ءبىرى - ءبىزدىڭ مەملەكەتتىڭ شەكارالاس ەلدەرمەن شەكارانى بەلگىلەپ، العانىن اتاپ ءوتتى.
«ەل پرەزيدەنتى نۇرسۇلتان نازاربايەۆتىڭ سارابدال ساياساتىنىڭ ارقاسىندا بارلىق پەريمەتر بويىنشا قازىرگى ۋاقىتتا تاتۋ كورشىلىك قاتىناس ورناعان. بۇگىنگى تاڭدا مەملەكەتىمىز كورشى ەلدەرمەن كەلىسىمگە كەلە وتىرىپ، ەل شەكاراسىن بەلگىلەپ الدىق. قازىرگى ۋاقىتتا شەكارانى شەگەندەۋ تۋرالى كەلىسىمدەردى قىرعىزستان، وزبەكستان ەلدەرىمەن جۇرگىزۋ جوسپارلانعان. بۇل باعىتتا قىتاي ەلىمەن جۇمىس اياعىنا جەتتى. قازاقستان مەن رەسەي شەكارالارىن شەگەندەۋ تۋرالى جۇمىس جالعاسىپ جاتىر. سوندىقتان بارلىق ەلدەرمەن شەكارانى شەگەندەۋ جۇمىسىنىڭ ماڭىزى زور»، - دەيدى نۇرلان نىعماتۋلين.
