استانانىڭ بايلارى ساراڭ: تاكسي جۇرگىزۋشىسى ەلوردانىڭ تۇنگى «تىرشىلىگى» قانداي ەكەنىن ايتتى
قاز-قاتار تىزىلگەن مينيسترلىكتەر، الۋان ءتۇرلى بيزنەس-ورتالىقتار مەن جۇمىسىنا اسىعا اياڭداعان ادامدار - مۇنىڭ بارلىعى قالانىڭ تەك كۇندىزگى كورىنىسى عانا. ال، تۇندە...
تۇندە قالادا تىرشىلىك قىزا ءتۇسىپ، باي-باعلاندار مەيلىنشە «اسىر سالاتىن» كورىنەدى. استانانىڭ جۇرت ايتقانداي «توقالدار» قالاسى ەكەنى راس پا؟ باس شاھاردىڭ باي-باعلاندارى قانداي؟ NUR. KZ پورتالى اتالعان ساۋالدارعا جاۋاپ ىزدەۋ ماقساتىمەن، باس قالا تاكسوپاركتەرىنىڭ بىرىندە قىزمەت ەتەتىن تاكسي جۇرگىزۋشىسىمەن تىلدەسىپ قايتتى.
استانا تۇرعىندارىن قالانىڭ ءتۇرلى اۋماقتارىنا جەتكىزىپ، ناپاقاسىن وسى تاكسي جۇرگىزۋشىسى بولىپ تاۋىپ جۇرگەن جانداردىڭ ءبىرى - ايبار (اتى-ءجونى اۆتوردىڭ وتىنىشىمەن وزگەرتىلدى) ەسىمدى ازامات. وسىمەن بىرنەشە جىل قاتارىنان جولاۋشىلار تاسىمالداۋمەن شۇعىلدانىپ جۇرگەن ول، تۇندە ءتۇرلى «قىزىقتاردىڭ» ورىن الاتىنىن، اسىرەسە، بايلاردىڭ بارىنشا «سايران» قۇراتىنىن ايتتى.
«تاكسيست قىزمەتى سونىمەن دە قىزىقتى شىعار. نەشە ءتۇرلى ادامداردى كورىپ، تانىسىپ جاتامىز. تۇندە تاكسيگە قانداي ادامدار وتىرمايدى دەسەڭىزشى؟ جاسى دا، كارىسى دە، بايى دا، باعلانى دا، ءتىپتى، توقالداردى دا جەتكىزىپ سالعان كۇندەرىمىز بولدى. شىنى كەرەك، كەيدە داۋلەتى اسىپ-تاسقان، شەندى-شەكپەندىلەرگە قاراعاندا، ءبىز سياقتى ءناپاقاسىن ادال ەڭبەكپەن تاۋىپ جۇرگەن، اي سايىن پاتەر جالداپ، نەسيە تولەپ تۇراتىن قاراپايىم جاندار ارتىق پا دەپ قالاسىڭ. كوپ كەزدە بايقايتىنىم، بايلاردىڭ دەنى باقىتسىز بولادى.
كوبىنەسە اۋقاتتىلار ىشىمدىككە تويىپ الىپ، ۇيلەرىنە جەتكەنشە اڭگىمەلەرىن ايتىپ، ىشكى جان-سىرلارىن اقتارىپ جاتادى. سوندا، كوپ جاعدايدا ەستيتىنىم، «ايەلىم كەتىپ قالدى»، «بالام ىشىمدىككە سالىنىپ كەتتى» نەمەسە «دوستارىم ساتىپ كەتتى» دەگەن سىندى اڭگىمەلەر. ال، تۇگى جوق كەدەي بولسا، كۇندەلىكتى تۇرمىسىنا تاۋبە دەپ، قالتاسىنىڭ جۇقا بولعانىنا قاراماستان، «وتباسى مەن بالالارىم امان، باقىتتىمىن» دەپ جاتادى»، - دەپ اعىنان جارىلدى تاكسي جۇرگىزۋشىسى.
سونىمەن بىرگە، ول ەلوردانىڭ بايلارى ساراڭ، ءار تيىنىن ەسەپتەپ، شۋ شىعارۋعا اۋەس بولىپ تۇراتىنىن جەتكىزدى.
«ءبىر قىزىعى، الگىندەي بايلار جەتەتىن جەرلەرىنە جەتىپ الادى دا، ءار تيىنىن ەسەپتەپ وتىرادى عوي. سونداي كەزدە، بۇلارعا نە جەتپەيدى دەپ ويلايمىن؟ «ول اقشانى مەن ەمەس، مىنا كولىكتەگى قۇرىلعى كورسەتىپ تۇر» دەسە دە تۇسىنبەيدى. تاكسپوپارك باسشىلىعىنا دەيىن حابارلاسىپ، ءبىزدىڭ ۇستىمىزدەن شاعىمدانىپ جاتادى. ولار ءتىپتى 50 تەڭگە ءۇشىن ساۋدالاسۋعا اۋەس بولىپ تۇرادى.
تاعى ءبىر بايقاعانىم، شاھاردا توقالدار كوپ. الگىندەي اتقامىنەرلەر تۇنگى ۋاقىتتا سول توقالدارىمەن كوڭىل كوتەرۋگە اۋەس. اسىرەسە، وڭىرلەردەن ءىس-ساپار نەمەسە جۇمىس بابىمەن كەلگەن شەندى-شەكپەندىلەر وسىندا كەلگەن سايىن، الگى توقالدارىمەن كەزدەسىپ تۇرادى، ءبارىنىڭ استانادا ءبىر-ءبىر توقالى بار. ارينە، اۋقاتتىلاردى قارالاعانىم ەمەس، ءبىراق ول شىندىق، وندايدىڭ تالايىن كورگەنبىز»، - دەپ ءسوزىن تۇيىندەدى جۇرگىزۋشى.
